Il di uffizial da la Festa federala da tir 2026 a Cuira la sonda ils 13 da zercladur ha purtà numerus puncts culminants. Il suentermezdi hai dà il grond til da festa tras il center da Cuira. Cun 15 minutas retard – a las 15.15 – ha il til cumenzà. Ils aspectaturs e las aspectaturas spetgavan gia vess. Cunquai ch'il sulegl splendurava eran las temperaturas plitost chaudas. Tgi che ha chattà in plaz en la sumbriva aveva cletg.
Radund 1'000 participants e participantas en total 29 furmaziuns èn ids tras la citad. Da la partida eran corps da musica, chars da cortegi decorads festivamain sco er uniuns ed organisaziuns che preschentavan il tir e l'usit. La ruta ha manà da l'Alexanderplatz sur il Postplatz e la Grabenstrasse tras il Welschdörfli – fin sin la plazza avant la Stadthalle. L’atmosfera era buna e lucca.
Impressiuns dal til da festa
-
Bild 1 von 17. La musica da la citad da Cuira ha avert il til. Bildquelle: RTR.
-
Bild 2 von 17. Gist suenter ils giasts d'onur, nua ch'era cusseglier federal Martin Pfister era da la partida, è il comité d'organisaziun vegnì. Lucas Caduff fa l'entschatta. Lucas Caduff porta la tavla. Bildquelle: RTR.
-
Bild 3 von 17. Hubert Tomaschett, Martin Candinas ed Esther Hug dal comité d'organisaziun. Bildquelle: RTR.
-
Bild 4 von 17. Sin visita en Svizra. Societad svizra da tir en il exteriur. Bildquelle: RTR.
-
Bild 5 von 17. Uniuns localas da Cuira e da Jenins. Bildquelle: RTR.
-
Bild 6 von 17. Il chantun ospitant. Bildquelle: RTR.
-
Bild 7 von 17. In char da cortegi che representa il engirament dal Rütli. Bildquelle: RTR.
-
Bild 8 von 17. Diversas bandieras d'uniuns da tir dals chantuns Uri, Sviz, Sursilvania e Sutsilvania. Bildquelle: RTR.
-
Bild 9 von 17. La musica da guggas procura per buna luna. Bildquelle: RTR.
-
Bild 10 von 17. Ulteriuras bandieras da diversas uniuns da tir. Bildquelle: RTR.
-
Bild 11 von 17. L'unifurma istorica na dastga betg mancar. Bildquelle: RTR.
-
Bild 12 von 17. Musica populara à la festa federala da tir. Bildquelle: RTR.
-
Bild 13 von 17. Uffants dals chantuns Appenzell Dadens e Dadora han repartì dultschims. Bildquelle: RTR.
-
Bild 14 von 17. Il chantun Giura ha repartì lur chaschiel spezial «Tête de Moine». Bildquelle: RTR.
-
Bild 15 von 17. Ils bittabandieras. Bildquelle: RTR.
-
Bild 16 von 17. Sunatibas. Bildquelle: RTR.
-
Bild 17 von 17. Bildquelle: RTR.
Gia l'avantmezdi ha gì lieu en l'Obere Au l'act festiv uffizial. Silsuenter ha la Patrouille Suisse procurà per spectacul cun ina show da sgol sur il Rossboden e la citad da Cuira. La fin dal di uffizial furma la saira la festa en ed enturn la Stadthalle da Cuira, nua ch'ils organisaturs spetgan radund 3'000 visitadras e visitaders.
La Festa federala da tir ha cumenzà uffizialmain
Sper il sajettar gioga sa chapescha era la cuminanza ina rolla impurtanta. L'atmosfera para buna, sco differents tiradurs ed ina tiradura raquintan: «Nus ans legrain fitg ch'i va uss liber.» Sper tut quellas vuschs positivas, datti dentant er in pèr vuschs criticas. Cunzunt quai che pertutga l'organisaziun davart la controlla d'armas ch'ha gì lieu gievgia saira e ch'è obligatorica per tuttas e tuts che vulan sajettar. Questa controlla è part dal concept da segirezza. «L'organisaziun davart la controlla d'armas è stada fitg schletta. Nus avain spetgà fin trais uras», ha in tiradur ditg a RTR.
Il comité d'organisaziun saja conscient dal dischurden da gievgia saira, sco Martin Candinas, il president da la festa federala da tir declera. «Nus avain fatg in sbagl da far la controlla d'armas pir a las sis. Retrospectiv faschessan nus quai auter. Ma nus emprendain da noss sbagls.»
Il sajet da partenza quel è dà, l'euforia gronda. Ussa vali be pli da tutgar il «nair», saja quai per ils tiradurs e las tiraduras sco era per il comité d'organisaziun.
Cuira durant in mais il center dal sport da tir svizzer
La Festa federala da tir vegn organisada mo mintga tschintg onns e vala sco grond eveniment sportiv. Ella unescha la concurrenza sportiva, isanzas vividas ed uniun federalistica. La 59avla ediziun da la Festa federala da tir 2026 stat sut il motto «tradiziun e passiun». Spetgads vegnan 36'000 tiraduras e tiradurs e 100'000 aspectaturas ed aspectaturs.
Suenter 40 onns ha la festa federala da tir puspe lieu a Cuira – e las preparativas per quai grond eveniment sajan stadas intensivas, di il president dal comité d'organisaziun Martin Candinas. «Ussa, suenter 5 onns preparaziun, vulain nus finalmain laschar liber», di el.
Nus avain uschè blera glieud che dat uschè bler cor en quest project ch'i sto simplamain reussir e daventar, sco il tudestg di, in 'Volltreffer'!
Tuttina dettia quai anc difficultads, manegia el, per exempel da chattar avunda voluntaris. Da las circa 5'000 ch'i dovra per la festa federala mancan uss, trais emnas avant, anc bunamain 150. «Chattar avunda voluntaris è fitg difficil. En las regiuns ruralas èsi dentant pli simpel ch'en la citad a Cuira.»
El saja dentant persvadì, ch'anc dapli glieud s'annunzia, pli datiers che la festa federala da tir vegnia. Quella festa na dovra dentant betg mo bler lavur voluntaria, mabain èra in concept da segirtad. Var 35'000 tiraduras e tiradurs vegnan spetgads a la festa federala, tuts cun atgnas armas. Quellas ston vegnir controlladas e registradas, e quellas na dastgan betg simplamain vegnir laschadas per terra. Tuttina sa legra Martin Candinas – «quai sa mo vegnir bain!»
Decentral e modern
Il lieu principal e center da la festa è il Rossboden a Cuira. Ultra da quai vegnan organisadas las concurrenzas sin 19 plazzas da tir externas en l'entir chantun, tuttas cuntanschiblas entaifer maximalmain 45 minutas temp da viadi.
Per la citad da Cuira ed il chantun Grischun è la Festa federala da tir 2026 ina gronda occurrenza cun gronda attracziun. Durant pliras emnas porta l’eveniment blers visitaders en la regiun e procura per in impuls economic, surtut per l'hotellaria, la gastronomia ed il commerzi. Grazia a la realisaziun decentrala sin 19 implants da tir profiteschan er autras regiuns grischunas.
Per l'emprima giada vegn il tir da 300 meters fatg cumplettamain en furma digitala e senza avisaders. Ils resultats vegnan registrads e transmess directamain sin via electronica. Ils organisaturs fan uschia quint cun dapli effizienza, dapli segirezza ed ina meglra transparenza per il public e per las participantas ed ils participants.
Sajettà vegn cun schluppet (300m, 50m, 10m) e cun pistola (50m, 25m, 10m), inclusiv las categorias pusar, juniors e veterans. En tut stattan sin il program passa 140 differentas serias (Stiche) e 16 campiunadis.
Prova generala gartegiada
La sonda, ils 30 da matg, è stada la prova generala per la Festa federala da tir en il Grischun. Il di da la giuventetgna grischuna a Cuira cun bel e bain 250 participants e participantas ha funcziunà bain. Uss saja anc da glimar vi dals ultims detagls, di il president dal comité d'organisaziun, il cusseglier naziunal Martin Candinas.
Natiralmain datti anc intginas piculezzas che pudain optimar ils proxims dis – e suenter essan nus preparads per questa Festa federala da tir.
Ins saja sin buna via ed i dettia in success cumplain per l'entir chantun. El saja enorm cuntent che uschè bleras persunas gidian che quai gartegia. L’emprova da fieu è la gievgia, ils 4 da zercladur, cun il tir d’avertura che cumenza cun l’emprima punt exact a las 08:00 e chala cun l’ultim tir exact a las 18:00.
La muniziun
Ils differents tirs dovran era ina gronda quantitad da muniziun. Quella vegn furnida da l'Armada svizra – tuts e tuttas sajettan cun la medema sort muniziun, per garantir cundiziuns egualas.
En tut en vegnidas furnidas 2,2 milliuns sajets en differents calibers, per pistola e schluppet. Hubert Tomaschett, il responsabel per ils stans da sajettar, ha organisà transport e magasinaziun. Nua exact che quels magazins sa chattan na vegn betg tradì, per motiv da segirtad.
-
Bild 1 von 3. Hubert Tomaschett, responsabel per stans da tir, spetga sin la muniziun. Bildquelle: RTR.
-
Bild 2 von 3. Muniziun per la buis e per la pistola. Bildquelle: RTR.
-
Bild 3 von 3. En tut èn vegnidas furnidas 75 palettas muniziun. Bildquelle: RTR.
Organisaziun
Responsabla per la realisaziun è l'uniun Festa federala da tir 2026 Cuira, manada dal president dal comité d'organisaziun Martin Candinas en collavuraziun cun la Federaziun svizra dal sport da tir.
La festa munta ina gronda sfida organisatorica per citad, chantun e vischnancas, ch’è dentant pussaivla grazia a la lavur da radund 5’000 voluntarias e voluntaris che vegnan a prestar durant la festa en tut circa 150'000 uras da lavur.