En in scriver han las federaziuns annunzià ch'ellas vulan ir pervi da quest cas davant il Tribunal internaziunal da sport, TAS. Ina pledadra da medias da la federaziun austriaca da skis ha confermà las annunzias da diversas medias.
Ils accusaders èn da l'avis ch'ils principis democratics n'èn betg vegnids resguardads tar l'elecziun. Uschia n'hajan las 126 federaziuns betg gì la pussaivladad da tscherner, mabain be gì la pussaivladad d'eleger Eliasch u insumma betg votar. Uschiglio sajan las vuschs betg stadas valaivlas. Da las 70 vuschs che hajan pia votà per il successur da Gian-Franco Kaspar, sa dettia lura in resultat da 100%.
«Ina mala sgnocca»
Il president da Swiss-Ski, Urs Lehmann ha numnà questa elecziun en il Blick ina «Muppet-Show». Diego Züger, il suppleant dal mainafatschenta tar Swiss-Ski, ha discurrì d'ina mala sgnocca.
In'elecziun nua che la suletta pussaivla vusch è da dir Gea, na correspunda betg a nossa encletga dal dretg.
Envers la gasetta skinews.ch ha Swiss-Ski annunzià da dar l'entschatta da l'emna proxima ulteiuras infurmaziuns.
