Festa federala da lutga - Las emprimas lutgas èn enconuschentas – Orlik cunter Aeschbacher

Dals 29 fin ils 31 d’avust 2025 ha lieu la Festa federala da lutga e da gieus alpesters a Mollis, en il chantun Glaruna. La pli gronda festa da lutga da la Svizra è era quest onn in punct culminant per ils fans da la lutga grischuna. L’Associaziun da lutga da la Svizra Nordorientala ha selecziunà tschintg atlets grischuns per la festa. En tut ha l’Associaziun da lutga da la Svizra Nordorientala nominà 67 atlets e 5 da reserva.

Il retg cunter il talent ed ils dus pli gronds favurits ensemen

En l’emprima lutga frunta il retg Joel Wicki sin il giuven talent Michael Moser. Ils pli gronds favurits Samuel Giger e Fabian Staudenmann tiran gia a l’entschatta. Ed Armon Orlik cumbatta cunter Matthias Aeschbacher.

En sasez vaglia la regla che il retg actual survegn en l’emprima lutga ina lutgader cun cranz federal sco adversari. Cun preschentar la lutga tranter Joel Wicki e Michael Moser gia a l’entschatta ha il manader tecnic Stefan Strebel rut in tabu. El dat la schanza ad in giuven lutgader da sa mesirar cun il retg. Sco per exempel gia l’onn 2010 a Frauenfeld. Nua che il retg actual Jörg Abderhalden è vegni batti dal giuven Kilian Wenger. Quella victoria ha terminà la regenza dad Abderhalden e procurà per in nov retg: Wenger.

Armon Orlik sco cun favurit survegn en l’emprima lutga er in caliber. Ses num Matthias Aeschbacher. Finalist far la festa federala avant trais onns a Pratteln, nua ch’el ha stuì ceder a Joel Wicki. Il bernais Aeschbacher e segira da batter, i vul dentant la meglra prestaziun.  Armon Orlik aveva triumfà encunter Aeschbacher ta la lutga dal NOS la stagiun passada.

Team Grischun cun experientscha e talents giuvens

Armon Orlik (Maiavilla)
Il num il pli enconuschent en la lutga grischuna: Orlik è il leader dal team e va per la tschintgavla giada ad ina lutga federala. Il lutgader da Maiavilla è in dals gronds favurits per il titel da «retg da la lutga». Nov onns suenter sia lutga finala ad Estavayer, vul el questa giada ir fin la fin e conquistar il titel da retg. Cun ina stagiun solida – set cranzs – è el pront per Mollis. Sia nominaziun era senza dubi.

Christian Biäsch (Tavau-Sertig)
Biäsch ha gì la meglra stagiun da sia carriera. Cun tschintg cranzs e prestaziuns fermas, ha el mussà ch’el è in dals pli ferms lutgaders dal chantun. Sia preschientscha a Mollis è meritada e motivanta, igl è la quarta festa federala per l'um da 29 onns.

Marc Jörger (Domat)
Il Rumantsch en il team. Cun mo in cranz questa stagiun, è sia nominaziun ina pitschna surpraisa. Dentant cun sia gronda experientscha – 31 onns e duas participaziuns a lutgas federalas – porta era Jörger gronda experientscha al team. Mollis è probablamain sia ultima lutga federala.

Josias Müller (Ziràn)
In dals dus giuvens talents. Müller ha mo gudagnà in cranz questa stagiun, ha dentant mussà prestaziuns solidas e constantas. Cun 19 onns fa el sia premiera a la lutga federala – ina gronda schanza per il giuven da la Val Schons.

Niklas Lötscher (Vaz Sut)
La gronda surpraisa dal team. Cun trais cranzs questa stagiun, ha il giuven da 19 mussà ch’el è pront per la gronda tribuna. Ina surpraisa èsi perquai ch'el è sa blessà il zercladur. Pir dapi curt po el puspè trenar. Sia prova generala è la lutga da la Schwägalp la dumengia che vegn.

Il team grischun represchenta ina cumbinaziun dad experientscha e giuvna motivaziun. Cun Orlik sco figura centrala e dus lutgaders che fan premiera, è la speranza gronda ch'il Grischun possia far ina buna figura a Mollis. Per Müller, Jörger, Biäsch e Lötscher è la Schwägalp la davosa prova. Armon Orlik ha in program spezial – el sa concentrescha sin trenament e regeneraziun.