La decisiun da terminar la carriera activa era per Cédric Follador in process. Gia avant la davosa stagiun ch’è ida a fin cun ils Gieus Olimpics a Milano e Cortina, ha il pilot da bob engiadinais fatg tscherts patratgs davart ses futur. El ha fatg las dumondas essenzialas. Vuless jau anc far enavant, co vuless jau far quai e surtut er cun tgi vuless jau far quai. Suenter che Cédric Follador ha ponderà questas dumondas è el vegnì a la conclusiun da chalar cun il sport da professiun.
Malsogna, finanzas e squadra
Perquai che la spusa da Cédric Follador è malsauna vuless el sustegnair ella anc pli ferm. Quai dovra peda. Vitiers vegn la situaziun finanziala ch’era adina fitg difficila. Il bob, ils schlusigls ed insumma tut il material ch'i dovra per il sport da bob è fitg char. Igl era adina fitg difficil da ramassar ils daners per finanziar ina stagiun da bob. Suenter tants onns en il sport è Cédric Follador unfis dad organisar adina puspè daners che pussibiliteschan ed el da far ses sport. Plinavant dettia il problem dals stumpladers. Divers atlets da sia atgna equipa chalan. Uschia ch’el vess stuì ir a la tschertga da novs stumpladers ed era quai na vuleva il sportist da 31 onns betg pli far.
Impressiuns da la carriera da Cédric Follador
-
Bild 1 von 4. Cédric Follador tar il campiunadi mundial da bob il 2023 a San Murezzan. Bildquelle: RTR.
-
Bild 2 von 4. Campiunadi mundial da bob a San Murezzan. Bildquelle: RTR.
-
Bild 3 von 4. Cédric Follador avant ils gieus olimpics 2026. Bildquelle: RTR.
-
Bild 4 von 4. Cédric Follador a Milano Cortina 2026. Bildquelle: RTR.
Er en futur restar fidel al sport da bob
Cédric Follador chala cun sia carriera activa, el vul dentant dar vinavant sias experientschas dad in decenni en il sport da bob a la proxima generaziun. Bain pussibel ch’el vegn a s’engaschar tar la federaziun da bob. Suttascrit n'ha el dentant anc nagut. Segir è dentant ch’el vegn a gidar en il chanal da glatsch da San Murezzan a Schlarigna nua ch’el vegn forsa a far viadis cun il bob per osps.