La partida è ditg stada equilibrada. L’equipa da la Germania – Borussia Dortmund – ha sur lung temp pudì controllar la partida, ma las schanzas grondas n’han els tuttina betg pudì nizzegiar. Suenter in corner da Real hai la finala dà l’emprim gol per ils Spagnols tras Dani Carvajal en la 74avla minuta. Il segund gol è suandà la 83avla minuta tras Vinícius Junior. Real Madrid porta pia per la 15avla giada la curuna dal ballape europeic.
Il goli svizzer Gregor Kobel ha mussà ina buna partida e tegnì pliras bunas schanzas da Madrid. La finala ha Real Madrid dentant nizzegià megler las schanzas e gudagnà cleramain quai final.
Ils dus fans eran plain tensiun
En vista al gieu da final aveva RTR discutà cun dus gronds fans: Marino Cavegn e Rico Cadalbert. Omadus èran plain tensiun – Rico ha schizunt guardà il gieu live a Londra. Quai eran las prognosas ed emoziuns dals dus fans avant il final:
Marino Cavegn – fan da Real Madrid
En il stadion da Wembley a Londra spitgava oz d'ina vart la squadra da Real Madrid. Gia 14 giadas avevan els fin uss gudagnà il final da la Champions League – pli savens che tut ils auters clubs. La davosa victoria ha Real celebrà il 2022 cunter Liverpool cun 1 a 0. Sin basa da questas cifras pareva la squadra spagnola d'avair pulit bunas schanzas. Sin ina proxima victoria da Real Madrid ha er Marino Cavegn – ch'è grond fan dal club – sperà ferm.
Jau sun gia da pitschen ensi stà grond fan da Real Madrid.
Marino Cavegn aveva ditg ch'el vegn a persequitar il gieu a chasa. El pensa che Real Madrid vegn ad empruvar da far spert l'emprim gol, pia far bler squitsch gia a Dortmund davent da l'entschatta dal gieu. Marino Cavegn è persvas che la squadra spagnola vegn er a gudignar quest final, cunzunt perquai ch'els sajan pli madirs.
Nus enconuschin quels finals e vain gia fatg atras bleras giadas quai. Perquai vegnin nus er ad ir la 15avla giada per il titel.
Rico Cadalbert – fan dal BVB
Er il club da Borussia Dortmund (BVB) è stà semtgà d'ir per il pocal. Gudagnà l'occurenza da Champions League han els dentant fin uss mo ina giada – quai l'onn 1997 cunter Juventus Turin cun 3 a 1. Tenor Rico Cadalbert – ch'è gia grond fan dal BVB dapi blers onns – pudess dentant exact questa rolla da «outsider» forsa esser d'avantag per il club tudestg.
Nagin quinta cun nus, quai è exact nossa fermezza.
Questa saira è Rico Cadalbert – ensemen cun nov collegas – schizunt live da la partida per guardar il final a Londra e sustegnair ses club preferì. I saja stà grev da survegnir ils tickets, ma cunzunt era char. Ussa sa legria el dentant extrem e giaudia l'atmosphera a Londra tar il stadion da Wembley.
I ha ina massa glieud, naturalmain er ina massa fans da Dortmund. La cità è bunamain diltut melna. Tuts èn spanegiads.
El quinta cun in gieu plitost tactic, munta ch'omadus na vegnian betg a dar «vollgas» gia l'entschatta. Sia speranza saja da betg survegnir in gol e lu en la segunda mesadad da far in u dus gols.