Siglir tar il cuntegn

Header

cuntegn

Gieus en dus lieus Fabian Ritzmann – tranter Biasca e Tavau

L’attatgader Fabian Ritzmann da Scuol vul ina plazza en il cader dal HCD. Il giuven giugader da hockey ha cumenzà la nova stagiun cun Tavau, ha lura dentant stuì giugar la gronda part dals gieus a Biasca. Cun bunas prestaziuns as vul el recumandar per il HCD.

Gia la fin da la stagiun passada ha Fabian Ritzmann pudì dar partidas cun l’emprima equipa dal HCD. Suenter che la stagiun en la Swiss League cun Biasca era a fin, è l’attatgader vegnì clamà a Tavau. Suenter la stagiun è Ritzmann lura gist restà en il Grischun. Cun il Club da hockey da Tavau ha el pudì far l’entira preparaziun sin la nova stagiun. Ritzmann ha era pudì dar l’emprim gieu dal nov campiunadi cun il HCD, lura dentant è el puspè vegnì tramess a Biasca en la Swiss League.

Gronda part a Biasca, trais partidas cun il HCD

La pli gronda part da las partidas da questa stagiun ha Fabian Ritzmann dà cun Biasca en la Swiss League. Sche la situaziun pretenda dentant, cloma il trenader dal HCD Christian Wohlwend l’attatgader a Tavau. Uschia ha l’Engiadinais pudì dar fin qua trais gieus cun Tavau. L’emprim gist cunter l'EV Zug, alura era cunter Genevra ed il davos gieu avant la pausa da november cunter Ambri.

audio
Fabian Ritzmann: Tranter Biasca e Tavau
ord Actualitad dals 10.11.2021.
laschar ir. Durada: 2 minutas 35 Secundas.

Finamira d'avair ina plazza en il cader dal HCD

Mussar bunas prestaziuns, alura vegn quai schont, è Ritzmann persvadi. Mintga giada ch'el va sin il glatsch vul el mussar la meglra prestaziun, e spera ch’el possia far uschia il pass en l’emprima equipa da Tavau. In pèr giadas era il giuven hockeyan uss gia part da l’equipa da Tavau. Sia finamira è dentant da madirar ad ina forza stabla en l’equipa dal campiun da record.

RTR actualitad 17:00

Artitgels legids il pli savens