Siglir tar il cuntegn

Header

audio
Giugadur Davyd Barandun davart il success
Or da Actualitad dals 01.01.2024. Maletg: Keystone
laschar ir. Durada: 1 minuta 18 Secundas.
cuntegn

Gudagnà la Cuppa Spengler Tavau ha tegnì pitg als gronds Tschecs

Tavau n'ha betg laschà vegnir datiers pli ils Tschecs en il davos terz. 5:3 èsi il davos stà, er sche Pardubice ha fatg squitsch pulit en il davos terz. Suenter il terz gol per ils Tschecs èn la 52avla minuta èsi stà finì e Tavau gudogna suenter 11 onns puspè la Cuppa Spengler.

La partida è stada turbulenta e per part furiusa. Tavau è ì en avantatg cun 2:0, lura ha Pardubice dentant egualisà aifer 13 secundas. Cun ils dus gols en la 40avla e 42avla è lura la decisiun per Tavau vegnida.

In offside dispitaivel al cumenzament

Pardubice ha cumenzà cun squitsch. Il goli da Tavau Aeschlimann ha dentant tegnì tut. I ha dà bler sajets dals Tschecs, dentant betg or da posiziuns optimalas.

Lura ha dentant Tavau tutgà. Dennis Rassmussen ha procurà per il 1:0, suenter ch'in gol da Pardubice n'ha betg valì pervia d'ina situaziun d'offside.

video
Rassmussen tutgà il 1:0
Or da Sport-Clip dals 31.12.2023.
laschar ir. Durada: 1 minuta 1 Secunda.

En la liga ha Dennis Rassmussen sajettà 3 gols en 28 partidas (e 14 assists). En la cuppa da Spengler è el dentant en ina autra furma, cun 5 gols è el stà il pli impurtant scorer dals da Tavau.

Il segund terz ha cuntinuà magari furiusamain. Tavau ha dentant gì l'avantatg. Suenter pliras schanzas ha Olofsson tutgà en la 37avla minuta. Pardubice reagescha cun dus gols, Dahlbeck tutgà da la lingia blaua e procura per il 3:2.

video
Il 3:2 da Dahlbeck
Or da Sport-Clip dals 31.12.2023.
laschar ir. Durada: 1 minuta 4 Secundas.

Rasmussen ed Olofsson han lura anc pachetà sisura dus gols en la 40 e la 42avla minuta. Er sche Mandat da Dynamo Pardubice ha procurà per il 5:3 en la 52avla, n'ha l'equipa tscheca betg pudì trair suenter dal tut pli.

video
Dus gols aifer duas minutas decidan il gieu
Or da Sport-Clip dals 31.12.2023.
laschar ir. Durada: 2 minutas 1 Secunda.

Lur davos gieu han ils Tschecs anc mussà ch'els pudessan egualisar in tal dischavantatg, ed er en la liga a chasa giascha i bun per els. Cunter Tavau n'ha quai dentant betg tanschì. Er sche l'equipa tscheca è stada la pli robusta e ferma. En media èn ils giugadurs tschecs numnadamain 3 kilos pli grevs che quels da Tavau, ed er ils pli gronds da tut las equipas dal turnier.

Per Tavau è quai la pli gronda victoria dapi il campiunadi 2015, ed ina bella moda da celebrar il 100avel giubileum da la Cuppa Spengler.

RTR novitads 14:00

Artitgels legids il pli savens