Siglir tar il cuntegn

Header

Legenda: Er ils fans èn puspè enavos en il stadion. Keystone
cuntegn

Hockey NL HCD gudogna il classicher cunter il SCB

Il Club da hockey da Tavau ha gudagnà ils emprims puncts en questa stagiun. En il segund gieu da campiunadi ha Tavau battì a chasa il SC Berna piz a cup cun 3:1.

Ils bun 4’000 fans en il stadion da Tavau che sa preschenta en in nov vestgì han stuì avair ditg pazienza fin l’emprim gol. Pir en la 33avla minuta èsi reussì al Svedais Mathias Bromé da manar l’equipa da chasa che festivescha quest onn il giubileum da 100 onns cun 1:0 en avantatg, quai suenter in conter sco ord il cudesch. En la 43avla minuta ha l’auter svedais en il cader dal HCD, Magnus Nygren, tutgà en powerplay al 2:0. Cun in gol en la 49avla minuta ha Thierry Bader pudì scursanir al 1:2 per il SCB, per dapli n’hai dentant betg tanschì per l’equipa da la chapitala.

En las davosas minutas ha Berna mess tut sin ina carta e remplazzà il goli cun in ulteriur giugader, quai è dentant ì en las chautschas. 40 secundas avant la fin dal gieu ha Yannick Frehner tutgà al 3:1 per il HCD en il gol vid ed uschia decidì quest classicher. Ils da Tavau han uschia pudì mussar ina reacziun suenter la terrada en l’emprim gieu da campiunadi ordaifer cunter l’EV Zug (2:5). Per Berna èsi perencunter la terza terrada en il terz gieu da campiunadi en questa stagiun.

Il proxim gieu dat il HCD il venderdi saira, ils 17 da settember, a chasa cunter ils Rapperswil-Jona Lakers.

Novitads 23:00

Artitgels legids il pli savens

Scrollar a sanestra Scrollar a dretga