Per la decisiun ha l’equipa da Christian Wohlwend procurà gia en las emprimas minutas. En la 5avla minuta ha Simon Knak tutg al 1:0 e bun duas minutas pli tard ha Magnus Nygren augmentà al 2:0. Silsuenter èsi stà in gieu intensiv cun schanzas sin omaduas varts. Per gronda part èsi dentant reussì al HCD da controllar il gieu ed uschia far revantscha per la terrada da 2:5 en l’emprima runda da campiunadi l’entschatta settember ordaifer a Zug.
Da victoria a victoria
Per Tavau èsi stà la 12avla victoria en ils davos 13 gieus da campiunadi. Il HCD resta uschia a la testa da la tabella cun ina reserva da quatter puncts sin il trio cun Friburg, Bienna ed ils Rapperswil-Jona Lakers. Ditg peda da sa revegnir n’han ils da Tavau betg, gia venderdi saira spetg il proxim gieu, ordaifer encunter il HC Ajoie.
