Siglir tar il cuntegn

Header

cuntegn

Hockey NL Proxima terrada per il HCD

Al Club da hockey da Tavau na vai betg sco giavischà la fin da l’onn 2021. Il HCD ha stuì magunar la terza terrada en seria. Suenter las terradas cunter ils ZSC Lions (1:5) e Lugano (4:6) ha Tavau er pers a chasa encunter l’EV Zug cun 1:2.

Il gieu encunter l’actual campiun svizzer ha en sasez cumenzà bain per il HCD. En la 12avla minuta han ils Egli’s da Tavau procurà per il 1:0. Dominik Egli ha sajettà il gol sin pass da Chris Egli. En il segund terz han ils da Zug lura dentant pudì volver il resultat. En la 26avla minuta ha Dominik Schlumpf egualisà al 1:1 ed en la 36avla minuta ha Sven Senteler tutgà al 2:1 ed uschia gia procurà per la decisiun.

Malgrà ch’il HCD ha anc ina giada mobilisà tut las forzas pussiblas en il davos terz n’èsi betg pli gartegià a l’equipa da Christian Wohlwend da sajettar ulteriurs gols. Uschia perda il HCD il terz gieu entaifer ils davos quatter dis. Ditg peda da sa revegnir n’han ils da Tavau betg. Gia la gievgia saira, pia be 24 uras suenter la terrada cunter Zug, frunta il HCD ordaifer sin Ajoie che sa chatta a la cua da la tabella. Igl è il davos gieu da campiunadi quest onn ed il davos gieu avant la Cuppa Spengler, il turnier da tradiziun che cumenza ils 26 da december a Tavau.

RTR actualitad 17:00

Artitgels legids il pli savens