En sasez avess Carlo Janka duì dar ses comeback en la cuppa mundiala a Bormio suenter bunamain 300 dis absenza. Ma il Grischun, che ha manchentà il cumenzament da questa stagiun pervia da problems cun il dies ed in'infecziun cun il coronavirus, desista sin las cursas sin la «Pista Stelvio».
La raschun èn ils dus trenaments tar ils quals il skiunz da Sursaissa è mintgamai sa tschentà sin ils ultims dus plazs cun in fitg grond retard.
Sche la vista n'è betg buna, manca la fidanza ed jau na stun betg endretg sin ils skis. Il mardi duain quels ir che han ina buna schanza sin buns resultats.
Comeback a Wengen
Sco quai che Janka ha ditg envers SRF, planiseschia el ussa ses return mez schaner a Wengen. La cursa rapida giusum il Lauberhorn giaja meglier per el.
Sisura survegnian ins bler tempo, lura suonda la part greva. A Bormio vai davent da 0 sin 100. Quai fai extrem grev.
La cursa rapida en l'Italia dal nord n'ha el anc mai propi fatg gugent. Il plaschair anticipà sin la cursa dal Lauberhorn è grond.
