Siglir tar il cuntegn

Header

Tavau volva la partida cunter Lugano l'ultim mument
Or da Sport-Clip dals 08.10.2022.
cuntegn

Liga naziunala Tavau gudogna ordaifer cunter Lugano cun 3:2

Suenter la terrada ier a chasa cunter Friburg ha il HCD mussà ina ferma reacziun e battì Lugano. Quai suenter ch'ils Tessinais manavan gia cun 2:0.

Fin la 44avla minuta na guardavi betg or suenter ina victoria per il Club da Hockey da Tavau. Lugano manava fin lura numnadamain cun 2:0 grazia a gols da Alatalo en il powerplay en la 9avla minuta e da Zanetti en la 22avla minuta. Pir en l'ultim terz èsi reussì als Grischuns da volver la partida entaifer da 13 minutas grazia a gols da Knak en la 43avla minuta e da Stransky en la 55avla minuta. Il gol decisiv per Tavau ha fatg Rasmussen gnanc duas minutas pli tard. Per Lugano èsi stà la quarta terrada en seria a chasa.

video
Lugano ha relaschà ses trenader Chris McSorley
Or da Sport-Clip dals 08.10.2022.
laschar ir. Durada: 25 Secundas.

Lugano cun nov trenader

Curt avant il gieu cunter Tavau è vegnì enconuschent che Lugano ha relaschà per immediat ses trenader Chris McSorley. Suenter otg gieus èn ils Tessinais actualmain sin il 10avel plaz. Els han be gudagnà trais partidas. Sinaquai hajan ins decidì en enclegientscha vicendaivla da sa separar. Il Canadais da 60 onns ha midà la stagiun passada tar Lugano. Avant era el bunamain 20 onns il coach da Genevra-Servette.

Il nov trenader vegn ad esser Luca Gianinazzi. L'um da 29 onns è actualmain trenader da la squadra d'elita U20 da Lugano. Igl è l'emprima giada che Lugano ha in trenader uschè giuven.

Trenader da hockey
Legenda: Il nov trenader da Lugano: Luca Gianinazzi SRF

Las ulteriuras partidas da la 10avla runda

  • HC Ajoie – Genevra Servette 2:3 suenter prolungaziun
  • HC Ambri Piotta – SCL Tigers 5:3
  • EHC Bienna – EHC Kloten 6:2
  • Losanna HC – EV Zug 6:1
  • Friburg – Berna 1:2 suenter prolungaziun

Tabella hockey liga naziunala

Avrir la box Serrar la box

Link tar Federaziun da hockey

RTR novitads 20:00

Artitgels legids il pli savens

Scrollar a sanestra Scrollar a dretga