Ils victurs da la lutga da buobs da Sertig
En la categoria da vegliadetgna pli auta ha Flavio Sutter da Teufen gudagnà. Il meglier Grischun è stà Nando Tenna sco terz. En la categoria da vegliadetgna fin a dudesch onns ha quai dà ina victoria indigena. Sämi Moser da Mut era il pli ferm. En la categoria fin indesch onns era Johann Mazenauer dad Appenzell il meglier. Il Grischun Andrin Hasler da Maladers è vegni segund. Ed en la categoria fin a diesch onns era Christian Fankhauser da Trub il pli ferm. Il meglier Grischun è stà Edi Inderbitzin da Praden sco quart.
Da la partida eran questa giada er dus giuvens engiadinais. Lino Caprez dad Ardez e Dario Hässig da Lavin. Els han terminà la lutga sin las plazzas 11 e 18.
La stupenta culissa da la val Sertig è gia dapi blers onns er la culissa per la lutga da buobs. Adina il di avant ch'ils gronds, vul dir che l’elita cumbatta per il titel a Sertig, èn ils buobs e giuvenils ils «retgs» dal lieu. Sin quatter differentas plazzas da resgim ed en quatter differentas categorias da vegliadetgna cumbattan buobs e giuvenils per victorias.
Uschè blers buobs sco anc mai
Passa 160 buobs e giuvenils èn s'entupads quest onn a Tavau Sertig per far la lutga. Per gronda part vegnan els da las differentas societads da lutga grischunas, dentant era dals chantuns Glaruna, Appenzell e Turitg. La lutga da buobs a Sertig è la davosa lutga per giuvenils en il Grischun. Uschia che la lutga è impurtanta. Mintgin vul mussar tge ch’el ha emprendi durant ils davos mais.
