Lutga da Sertig - Urban Raschle gudogna la lutga da Sertig

Urban Raschle da Mels ha gudagnà la lutga da Sertig. En la lutga finala ha il lutgader san gallais battì Roman Hochholdinger suenter bundant trais minutas e bittà il Grischun en il resgim. Per Urban Raschle era quest l’emprima victoria da sia carriera.

Cun la lutga finala è la carriera da Roman Hochholdinger da Favugn ida a fin. Suenter 22 onns en il sport da lutga, suenter sis lutgas federalas, e suenter ch’el ha gudagnà quaranta cranz ha Roman Hochholdinger pitgà las chautschas da lutga vi da la enconuschenta gutta.  

Roman Hochholdinger segund, ed ulteriurs Grischuns tranter ils megliers tschintg

Suenter la sconfitta da la lutga finala è Roman Hochholdinger crudà enavos sin plazza duos da la tabella. Sper el sun rangads ulteriurs duos lutgaders grischuns tranter ils megliers tschintg. Josias Müller da Ziran è vegni terz, Marc Jörger da Domat ha terminà la lutga sin plazza tschintg.

Era in trio engiadinais era da la partida

Gest trais lutgaders activs da la Societad da lutga engiadinaisa han fat part a la festa da lutga da Sertig. Riet Caflisch da Fuldera, Claudio Regli da Tarasp e Loris Beer da Ftan han terminà la lutga sin las plazzas quindesch e deschset.

La lutga da Sertig ha ina gronda tradiziun. Adina la fin da fanadur, principi d’avust ha lieu en la val laterala da Tavau questa festa da lutga. Sa chapescha che ils lutgaders grischuns vulan far furori tar lur lutga. Ils ultims onns è quai er adina gartegià. Marc Jörger da Domat per exempel aveva gudagnà la lutga da Sertig la stagiun passada.

Lutga da Sertig