Er en la lutga finala è quai vegnì al duel tranter Armon Orlik e Samuel Giger. L’emprim duel è i a fin cun in pari, en la lutga finala ha Samuel Giger bittà Armon Orlik en il resgim. Tuttina era Orlik cuntent cun sia prestaziun. El terminescha la lutga sin plaz quatter ed è actualmain cuntent cun sia furma. Vitiers vegn che mintga cumbat cun Samuel Giger è per il lutgader da Maiavilla ina bun trenament.
Sper Armon Orlik gudognan er Christian Biäsch da Tavau, Marc Jörger da Domat e Roman Hochholdinger da Favugn in cranz tar la festa da lutga a chasa.
Rangaziun finala:
- Samuel Giger (58,50)
- David Dumelin (57,50)
- Reto Koch, Marco Good (57,25)
- Armon Orlik (57,00)
- Christian Biäsch, Marc Jörger (56,75)
- Roman Hochholdinger (56,50)
Lutga da giubileum
Per l’emprima giada suenter trais onns datti puspè ina festa da lutga Grischuna – Glarunaisa. Pervi da la pandemia è la stagiun 2020 vegnida stritgada quasi dal tut. Er durant la stagiun 2021 hai mo dà per la gronda part festas da juniors u festas senza public. L’inscunter a Vaz Sut è pia l’emprim sco avant la pandemia. Tant pli grond è uss il plaschair dals organisaturs e dals lutgaders.
La festa da lutga Grischuna – Glarunaisa è la festa da giubileum per 100 onns Societad da lutga «Unterlandquart» a la quala er in dals favurits, numnadamain Armon Orlik fa part. La Societad da lutga «Unterlandquart» ha inaugurà dacurt la nova halla da trenament a Vaz Sut. Per il giubileum da 100 onns vulevan ils organisaturs preschentar al public la nova halla da trenament e festivar quest giubileum cun la lutga Grischuna – Glarunaisa. La festa ha pia lieu cun dus onns retard.
Varga 130 lutgaders da tschintg chantuns
La gronda part dals lutgaders da la festa a Vaz Sut vegn sa chapescha dals chantuns Grischun e Glaruna. Vitiers vegnan er lutgaders dals chantuns Appenzell, Son Gagl, Turgovia, dals chantuns da la Svizra Centrala ed in singul dal chantun Berna: Curdin Orlik. Perquai ch'il frar vegl dad Armon ha lutgà divers onns cun la societad che organisescha la lutga, po el er esser da la partida.