A las 12:30 han ils organisaturs stuì capitular a Saalbach. La pista ch'aveva patì ils dis passads massivamain da las cundiziuns da l'aura difficilas, n'ha betg pli pudì vegnir manada en in stadi ch'era pront per la cursa, malgrà ils custs enorms. Naiv e vents ferms che han buffà han engrevgià supplementarmain l'incumbensa. Malgrà che l'aura è sa meglierada, è suenter trais spustaments suandada curt suenter mezdi la decisiun definitiva che la cursa vegnia annullada.
Nagin duel tranter Odermatt e Sarrazin
Il grond final per il cumbat per la culla en il classament da la cursa rapida è uschia crudà en l'aua. Marco Odermatt (552 puncts) defenda senza cumbat ses avantatg da 42 puncts sin il franzos Cyprien Sarrazin (510 puncts) e gudogna per l'emprima giada la culla pitschna per il meglier skiunz da la cursa rapida da la stagiun. Suenter avair gudagnà il super-G, il slalom gigant ed il classament general da la cuppa mundiala èsi la 4. culla da la stagiun per il um da la Sutsilvania. Quai avevan reussì fin uss be Pirmin Zurbriggen (1986/87) e Hermann Maier (1999/2000, 2000/01).
Era en il classament da las naziuns gudogna la Svizra – quai per la quarta giada ils ultims tschintg onns. Cun las 56 plazzas da podest da quest onn, han las skiunzas ed ils skiunzs svizzers radund 1'600 puncts dapli che l'Austria sin plaz dus.
