Siglir tar il cuntegn

Header

Swiss Cycling
Legenda: Equipa svizra en la cursa da staffetta. Da san. Thomas Litscher, Sina Frei, Alexandre Balmer, Noëlle Buri, Luke Wiedmann ed Elisa Alvarez. swiss-cycling.ch
cuntegn

Camppiunadi mundial Leogang Team Relay senza Schurter e Neff

Emprima cursa – emprima schanza da medaglia per la Svizra al campiunadi mundial da mountainbike a Leogang en l’Austria. En la cursa da staffetta, l’uschenumnà team relay, mancan dentant ils dus gronds trumfs cun Nino Schurter e Jolanda Neff.

Neff e Schurter, dus dals gronds favurits a Leogang, sa concentreschan sin la cursa singula da cross country la sonda, ils 10 d’october.

Per la Svizra partan Sina Frei (dunnas elita), Thomas Litscher (umens elita), Noëlle Buri (dunnas U23), Alexandre Balmer (umens U23), Luke Wiedmann (umens U19) e la Grischuna Elisa Alvarez (dunnas U19). Alvarez è oriunda da Samedan ed è vegnida la fin fanadur campiunessa Svizra tar las junioras.

Equipa svizra vul defender il titel

L’equipa svizra parta sco il defensur dal titel en questa cursa da staffetta che vegn per l’emprima giada realisada cun mintgamai sis atletas ed atlets da mintga naziun. Ils davos trais onns, mintgamai cun Nino Schurter, ha la Svizra adina gudagnà aur.

Partenza dal team relay è a las 12:30 uras. Silsuenter spetgan oz anc las cursas dad e-mountainbike da las dunnas e dals umens. Là va tranter auter Ursin Spescha da Sevgein a la partenza. Er da la partida è la legenda franzosa Julien Absalon, l’anteriur rival da Nino Schurter.

Actualitad 11:00

Artitgels legids il pli savens

Scrollar a sanestra Scrollar a dretga