Las ultimas duas rundas da la qualificaziun èn vegnidas dadas senza aspectaturs. Enstagl da chant da fans e canerunas giud las tribunas – silenzi! Il scumond da public ha dentant in effect negativ sin dapli che be l’atmosfera en las hallas da glatsch. Hockey da la liga naziunala è business, e gieus senza aspectaturs èn cassas vitas.
Nagins gieus enfin ils 15 da mars
Ils playoffs na cumenzan betg la sonda proxima. Il manaschi dal campiunadi da las duas pli autas ligas da hockey sin glatsch svizzer è uss interrut fin ils 15 da mars. Quai ha decidì la radunanza extraordinaria da la liga. Ils clubs na vulan betg dar ils gieus da playoffs senza aspectaturs. Il motiv sajan las pretensiuns da las autoritads per cumbatter il coronavirus.
L'ulteriur proceder duai vegnir decidì ils 13 da mars.
RTR novitads 14:00
