La stagiun da skis passada è stada la meglra en la carriera da la skiunza engiadinaisa Vanessa Kasper. Gia a l'entschatta da la stagiun è ella vegnida en in bun ritmus ed ha terminà las emprimas cursas tranter las meglras 30 ed uschia fatg puncts. Lura dentant ha Vanessa Kasper pers in zicl il fil ed uschia era la speranza da sa qualifitgar anc per ils gieus olimpics a Milano Cortina.
La gronda finamira: pudair ir als gieus olimpics
Dapi l’entschatta da la stagiun era la gronda finamira da Vanessa Kasper da pudair far part als gieus olimpics. Il schaner, cura che la skiunza aveva gia scrit giu ils gieus olimpics, è ella turnada sin il livel da l’entschatta da la stagiun. Il mument ch’ella n’ha betg pli fatg uschè in grond squitsch a sasezza ha ella mussà las meglras cursas fin da qua. A Kronplatz en l'Italia, ed a Spindler Mühle en Tschechia il schaner ha Vanessa Kasper cuntanschì duas plazzas tranter las meglras 15. Quai era la qualificaziun per il slalom gigant olimpic. Quel ha la skiunza da Schlarigna terminà sin plazza 23.
A la fin da l’enviern anc ina giada ina ivetta
Suenter che Vanessa Kasper ha pudì far part als gieus olimpics, ed uschia accumplì in grond siemi ha ella anc ina giada mussà bunas prestaziuns. En Svezia ad Are è ella vegnida 16avla ed al final da la cuppa mundiala da skis a Lillehammer 10avla. Quai è il meglier resultat da sia carriera insumma.