Blers onns era Daniele Sette simplamain auter, magari vegniva el numnà in exot en il sport da skis. Betg pervia ch’el derivass dad in pajais che n'ha forsa betg uschè bler da far cun sport da skis, mabain pervia ch’el ha fatg blers onns tut sez per viver ses siemi: far cursas da skis.
L’entschatta ad Adelboden, il punct culminant a Bansko
Cumenzà ha l’istorgia da Daniele Sette en il sport da skis l’onn 2008 cun cursas da FIS. La premiera en la cuppa mundiala ha el gì tar las cursas da chasa l’onn 2014 ad Adelboden. Dapi lura era la pista dal Chuenisbergli ina da sias pistas preferidas.
Ils emprims puncts en la cuppa mundiala ha il skiunz da 34 onns era gudagnà ad Adelboden l’onn 2020. E ses meglier resultat en la cuppa mundiala ha Sette pudì festivar avant tschintg onns a Bansko en Bulgaria, nua ch’el ha realisà durant il segund percurs il meglier temp ed è vegnì 11avel.
Cuntent ch'i vegn uss in zichel pli quiet
Blers onns ha Daniele Sette organisà tut sez. Trenament, material, pistas, trenaders, viadis, sponsurs, simplamain tut. Perquai èsi per el suenter uschè blers onns grev dad anc pudair procurar per quella massa energia ch'i vul per esser cumpetitiv. Uschia ha el decidì: las cursas dals campiunadis svizzers a San Murezzan vegnan ad esser sias davosas cursas.
Per Daniele Sette è ida a fin l’istorgia dal sport da skis professiunal tar el a chasa, là nua che tut ha cumenzà.