Siglir tar il cuntegn

Header

Dario Cologna durant la cursa.
Legenda: Keystone
cuntegn

Tour de ski: quart di Cologna resta sin curs dals top 10

Dario Cologna ha stuì sa cuntentar cun plazza 18 tar la 4. etappa a Toblach sur ils 15 kilometers skating. Il Jauer ha cuntanschì l'arrivada cun in retard da 1:10 sin il victur Alexander Bolshunov.

Sin il classament general ha quest resultat però betg consequenzas gravantas. Sco sisavel resta Cologna vinavant classà tranter ils megliers. Il retard sin il podest munta uss però 1:30 minutas enstagl da 27 segundas. Plazza tschintg ha ina minuta avantatg. Cologna ha però gist trais concurrents che sesan si dies ad el.

Fähndrich croda or da las top 10

La passlunghista svizra Nadine Fähndrich n’è betg pli tranter las top diesch suenter la 4. etappa dal Tour de ski. Tar la cursa a Toblach sur 10 kilometers skating cun partenza singula è la Lucernaisa vegnida 24avla – cun in retard da 1:35 minutas sin la victura Jessie Diggins dals Stadis Unids.

Americanas restan a la testa

En il classament general croda Fähndrich cunquai enavos sin plazza 13. Per las top diesch ch’ella aveva mess sco finamira, mancan il mument 16 secundas. A la testa ha Diggins pudì augmentar ses avantatg sin la collega da team Rosie Brennan sin 20 secundas. La svedaisa Frida Karlsson ha sco terza gia ina minuta retard.

La cursa cuntinuescha la mesemna cun ina persecuziun en il stil classic.

RTR novitads 15:00

Artitgels legids il pli savens

Scrollar a sanestra Scrollar a dretga