Dario Cologna resta suenter la cursa da persecuziun a Toblach en ils top 10 dal Tour de Ski. Il Jauer è partì sco 18avel – ed ha terminà la cursa sur 13,3 kilometers en stil classic sin plaz 17.
En il classament general perda Cologna ina posiziun, ed è da nov 7avel. A la testa cun passa duas minutas avantatg è il Russ Alexander Bolshunov, che ha distanzià la concurrenza per bunamain ina minuta la mesemna. Sin plaz 3 dal Tour de ski è il Franzos Maurice Manificat, quel ha in avantatg da 1:40 minutas sin Dario Cologna.
Nadine Fähndrich cun buna prestaziun
Tar las dunnas è la passlunghista svizra Nadine Fähndrich vegnida 16avla. En la cursa da persecuziun sur 10 kilometers classic a Toblach, è la Lucernaisa quasi stada uschè sperta sco l'Americana Jessie Diggins che maina il classament general. Il spurt final ha però gudagnà la Russa Julia Stupak, avant la Svedaisa Ebba Andersson.
Nadine Fähndrich resta sco 12avla en il classament general radund ina mesa minuta davos las top 10.
