Implant da biatlon envida dad organisar cursas
L’implant da biatlon a Sclamischot, quai è ina fracziun tranter Strada e Martina en Engiadina Bassa, è vegnì construì ils davos onns. L’implant è alura vegnì adina in zichel pli grond e porscha uss diesch plazzas per trair a schiba. L’implant vegn surtut dovra sco implant da trenament. Perquai che tut l’infrastructura è installada avev’ins en Engiadina Bassa l’idea dad organisar cursas da la cuppa svizra da biatlon. Dapi la stagiun passada è quai uss realitad. Sin las loipas ed en il stan da trair a schiba vegnan uss fatg cursas da livel naziunal.
Indigenas tut cuntentas cun prestaziun
Las curriduras indigenas sco per exempel Alena Camastral da Scuol, u era Sari Egger da Samedan ed Anina Richter da Puntraschigna èn cuntentas cun lur prestaziuns. En il stan da trair a schiba avess quai dentant pudì ir in zichel meglier. Malgrà quai èsi ina stupenta experientscha da far cursas a chasa sin las loipas ch'ins enconuscha uschè bain. Suenter il sprint spetgan anc las cursas da persecuziun, ed er là vulan ellas far ina buna figura.
