- A Viktorija Golubic gartegi per l’emprima giada da cuntanscher il quartfinal d’in turnier Grand Slam.
- La Turitgaisa gudogna en l’otgavelfinal da Wimbledon cunter l’Americana Madison Keys cun 7:6 (7:3) e 6:3.
- En il quartfinal spetga Karolina Pliskova da la Tschechia, il numer 13 dal mund.
Igl è stà ina premiera gartegiada, che Viktorija Golubic ha cuntanschì a Wimbledon. En ses emprim otgavelfinal d’in turnier Grand Slam ha la Turitgaisa dà grondius, e battì l’Americana Madison Keys en dus sets.
En l’emprim set ha Golubic nizzegià che Keys fascheva blers sbagls. E tar il stan da 5:2 è ella stada datiers da gudagnar il set. Quatter games e dus breaks pli tard era Golubic dentant tuttenina enavos cun 5:6. En il tiebreak è ella lura puspè revegnida, ed ha decidì l’emprim set cun sia terza balla da matsch.
En il segund set han omaduas giugaduras stuì dar giu lur game. A Golubic è dentant gartegià il direct re-break – e tuttenina era ella cun 4:1 anavon. Suenter 1 ura e 39 minutas ha Golubic lura realisà sia segunda balla da matsch.
La proxima adversaria da la Turitgaisa è Karolina Pliskova da la Tschechia, il numer 13 dal mund. Quella ha eliminà la Russa Ludmilla Samsonowa en dus sets. La partida Golubic cunter Pliskova è il mardi.
