La davosa stagiun è stada difficila per Matteo Badilatti da Poschiavo. Il profi da velo da via ha stuì cumbatter cun ina mancanza da prestaziun. Durant l’entira stagiun n'era el bun da mussar sia prestaziun maximala. El aveva problems musculars. Dentant daco che quai era uschia na saveva el betg.
Per il solit cumenzava Matteo Badilatti ina cursa bain preparà, en furma e cun buns resultats persunals. Pli ditg che la cursa durava e main cumpetitiv ch’el era. Gia durant la stagiun passada ha Matteo Badilatti stuì ir a la tschertga dal problem ed ha chattà quel.
«Sin il velo n’ha jau gi in problem da posiziun»
Suenter blers tests ed emprovas ha Matteo Badilatti chattà il motiv per ses problems musculars e la prestaziun che n'era betg qua. Il ciclist da 33 onns ha chattà ora ch’el sesa fauss sin ses velo. Uschia ha el activà faussas musclas ed uschia n'ha el betg pudì duvrar tut ses potenzial. En la situaziun nua ch'i vegniva adina pli difficil e grev, smatgava el adina dapli, en consequenza da quai chalava sia prestaziun.
Suenter ch’el ha chattà il problem lavura Matteo Badilatti vi da la nova posiziun. Sport da prestaziun è sco la Furmla 1. I va per detagls e millimeters. Perquai èsi fitg impurtant co ch'ins sesa sin il velo.
Jau hai dad emblidar ils moviments che jau hai fatg fauss, ed emprender ils novs. Quai dovra temp.
Empruvar dad emblidar vegls musters
Gist sch'i na va betg, lura smatgan ins anc dapli. E precis quai è cuntraproductiv. Suenter ch'i na girava er betg la primavaira ha Matteo Badilatti stuì far in «reset». Vul dir ch’el ha mess il focus sin sia nova posiziun sin il velo, e sin il activar autras musclas. Actualmain è il ciclist da Poschiavo exact en quel process.
El ha da far tut fitg exact ed evitar ch’el croda en vegls musters. Quai dovra temp. Sche el è a la partenza dal Tour de Suisse che cumenza mez zercladur, quai na sa el anc betg. Era sche l’emprima etappa dal TdS, ch’el ha fatg gia tschintg giadas, è a Sondrio en Valtellina. Be paucs kilometers davent da ses lieu natal, la Val Poschiavo.