Curt avant Nadal aveva la liga da hockey interrut ils campiunadis da hockey en las ligas pli bassas. Pervia da las novas prescripziuns da corona dal Cussegl federal han ins decis quella giada dad interrumper il campiunadi. Cun la situaziun generala da la pandemia ch'è uss betg uschè dramatica han ins decidi da puspè cuntinuar cun ils campiunadis. En segunda liga, nua che gist trais equipas grischunas èn dachasa, dentant gist cun las serias da playoff.
Da nulla sin tschient en ils playoff
Las equipas engiadinaisas han sperà ch'ins possia puspè cuntinuar cun il campiunadi. Tuttina eran ins surprais ch'i cuntinuescha gist cun serias da playoff. Normalmain è quai il hockey il pli spert e pli dir da l’entira stagiun. Pervia da l’interrupziun dal campiunadi, dentant era pervia da cas da corona ed uschia isolaziun e quarantina, n'eri betg pli pussaivel da far trenaments intensivs. La cuntinuaziun dal campiunadi è per tut las equipas in zic ina partenza fraida en il campiunadi.
Equipas da l’emprima e da la segunda gruppa dattan sur crusch
L'EHC San Murezzan s’inscuntra en ils playoff cun Küssnacht. Lai Valbella cun l’equipa da l'EV Zug. Il pli difficil vegn la situaziun per il Cdh Engiadina ch'ha da dar l’emprima runda da playoff cun il victur da la qualificaziun da la gruppa in, cun l'EHC Sursee. Il Cdh Engiadina ha dentant gia uss ademplì la finamira da la stagiun cun sa qualifitgar per ils playoffs. Tut quai che vegn ussa anc è il dessert da questa stagiun.
