US Schluein Glion ha en mira la 2. liga
L’equipa da la Foppa ha cumenzà il campiunadi cun ina terrada da 2:3 cunter Mels. Dapi lura è l’US Schluein Glion però strusch da frenar en questa terza liga. Cun excepziun dad in pari da 4:4 cunter il capo-gruppa Sargans ha l’USSI gudagnà tut ils gieus, il davos 8 gieus en seria.
Grazia als capo sajettagols Lars Zala (13 gols) e Lars Caduff (9 gols) è Schluein Glion la meglra equipa offensiva da l’entira liga. Cun in punct dischavantatg sin Sargans ha l’equipa da la Foppa mussà ch’ella ha la qualitad da danovamain cumbatter per la promoziun en la segunda liga.
Resultats e tabella
CB Trun/Rabius vi da rimnar experientscha
Cun in media da vegliadetgna da bun 23 onns è l’equipa da la Cadi ina da las giuvnas en questa liga, quai suenter che plirs giugaders rutinads han terminà lur carriera suenter l’ultima stagiun. Cun pauca experientscha ha l’equipa da Claudio Bundi cumenzà optimal la stagiun.
9 dals 10 puncts che l’equipa ha sin il conto suenter la runda d’atun ha Trun/Rabius recaltgà en ils emprims tschintg gieus da campiunadi. Dapi lura hai però da be pli in punct en sis gieus. Magari ha er il cletg mancà. Uschia n’ha Trun/Rabius betg pudì sa distanziar dal stritg. Che la qualitad è dentant avant maun ha l’equipa mussà diversas giadas. Sco gia ils davos onns cumbatta Trun/Rabius uschia er la primavaira per in plaz amez la tabella.
CB Lumnezia e lur blessuras
Dus puncts davos Trun/Rabius sa chatta il CB Lumnezia ch’ha dumagnà la stagiun passada la promoziun en terza liga. Ils Lumnezians han stuì desister sin 4-5 giugaders da tschep ch’èn sablessads. Per in’equipa sco il CB Lumnezia ina greva frida, da l’auter maun er ina schanza per ils giuvens. L’equipa da Marco Blumenthal ha fatg il meglier pussibel ord la situaziun ed è sa preschentada stupent cun quest cader reducì.
Malgrà duas terradas stretgas da mintgamai 1:2 en ils derbis sursilvans cunter Trun/Rabius e Schluein Glion han ils Lumnezians mussà ch’els han la qualitad da sa tegnair en questa terza liga. E turnan ils giugaders-clav puspè la primavaira n’è l’equipa betg in candidat per la relegaziun, mabain in’equipa che po senz’auter sa rangar amez la tabella.
La runda da primavaira cumenza ils 4 d’avrigl 2026.