US Schluein Glion
Dapi la relegaziun enavos en 3. liga la stagiun 2021/2022 cumbatta l'equipa da la Foppa per la promoziun enavos en segunda liga regiunala. Ils ultims onns hai dentant adina dà equipas ch'eran anc pli fermas che Schluein Glion. La stagiun passada, per exempel il FC Bogn Ragaz. Ils ultims onns è Schluein Glion bain adina stà in'equipa davanttiers en la tabella, ma per la testa n'hai mai bastà.
Dar davanttiers gea, ma betg finamira da dumagnar promoziun
Sin la nova stagiun hai dà bleras midadas. Plirs giugaders da tschep han terminà lur carriera activa. Uschia è l'equipa spezialmain vegnida cumplettada cun giugaders giuvens. Giugaders cun da bler potenzial che dovran dentant er anc in zic temp per sa disar vi dal ballape activ. Ils leaders da l'equipa è il bloc enturn il capo-tiragols Lars Caduff, Lars Zala u Rafael Deplazes ch'è turnà d'ina blessura. En media ha il cader da la US Schluein Glion ina vegliadetgna da strusch 21 onns.
Cumenzà la nova stagiun ha la US Schluein Glion cun ina terrada da 2:3 encunter Mels, il favurit per la promoziun. Silsuenter hai dà ina victoria da 4:2 encunter il FC Triesen.
CB Lumnezia
Suenter trais onns pausa èn ils Lumnezians turnads en 3. liga. Dumagnà la promoziun han els a moda suverana. Insumma è l'ultima stagiun stada ina stagiun da success per il CB Lumnezia. Sper la promoziun han els era cuntanschì il final da la Cuppa grischuna, nua ch'els han mo piz a cup pers encunter il favurit da Schluein Glion. L'equipa promovida ha natiralmain la gronda finamira da tegnair la classa. Savend ch'i vegn tut auter che simpel.
Cun in cader cumplet èsi pussaivel da tegnair la classa
Tar il CB Lumnezia è la situaziun dapi onns fitg sumeglianta. È il cader cumplets è l'equipa fitg ferma ed era pli che mo madira da tegnair pitg als adversaris, er en terza liga. Crodan dentant giugaders davent, pervia da blessuras u auters motivs, vegni spert fitg stretg tar ils Lumnezians. E la nova stagiun en 3. liga ha gist cumenzà cun da bler blessuras, 4-5 giugaders da tschep mancan actualmain, tranter els petgas fermas sco Mauro Demont u Matthias Alig. Uschia na pon els da preschent betg trametter la meglra equipa pussaivla sin il plaz.
Cumenzà la nova stagiun ha il CB Lumnezia cun in pari dad 1:1 encunter il FC Triesenberg. Il segund gieu han els pers cun 0:2 encunter Sevelen.
CB Trun/Rabius
L'equipa da la Cadi è vegnida da s'etablir en 3. liga. La stagiun 2025/2026 è gia la setavla stagiun en roda en questa liga. Per il grond pass enavant n'hai dentant fin oz mai tanschì. Il bler è l'equipa stada da chattar en il cumbat da relegaziun u insanua amez la tabella. La gronda sfida tar il CB Trun/Rabius è la constanza. Ha l'equipa in bun di è ella buna da gudagnar encunter mintga adversari en questa liga. Ha l'equipa dentant in schlet di, è ella er buna da perder encunter mintga adversari.
Finamira è da restar en terza liga, ma atgnamain fiss dapli pussaivel
Sumegliant sco tar la US Schluein Glion, han era tar il CB Trun/Rabius plirs giugaders rutinads terminà lur carriera suenter l'ultima stagiun. L'equipa è uschia en media in toc pli giuvna che l'onn passà. La media da vegliadetgna è tar bun 23 onns. Cuntrari ad il CB Lumnezia è il cader dentant pli lads e l'equipa è er capabla da cumpensar blessuras.
Uschia dastgins segir puspè spetgar ch'il CB Trun/Rabius vegn da tegnair la classa e sch'i va bain er da sa classar entamez. Sco grond leader da l'equipa dastgins segir vesair il capitani Mathias Flepp. Enturn el duain giugaders giuvens sco Matia Friberg u Nico Caduff pudair far il proxim pass.
Cumenzà la nova stagiun ha il CB Trun/Rabius cun ina terrada dad 1:3 encunter Triesen ed ina clera victoria da 4:0 encunter Cuira 97.