Las ultimas stagiuns ha il CB Schlarigna adina terminà en il champ d’amez da la quarta liga. Ils onns nua che la squadra era en il cumbatta da relegaziun èn gia in zichel pli vegls. Insumma ha il CB Schlarigna adina da guardar dad ina a l’autra stagiun cun tge equipa ch'ins va en il campiunadi. Pervia da blers motivs vegnan e van adina inqual giugaders. La vista da l’equipa è dad onn ad onn in'autra.
Schi cumenza a girar, alura funcziuna quai.
Buns giugaders cun experientscha
Questa stagiun è quai dentant in pau auter. La vista da la squadra è bain in'autra che anc la stagiun passada. Ils novs giugaders èn dentant per part giugaders cun experientscha e betg blers agens juniors. Quai è per il schef da sport dal CB Schlarigna Amos Sciuchetti il motiv principal pertge che las prestaziuns da l’equipa èn durant la runda d’atun uschè bunas. Il CB Schlarigna è actualmain a la testa da la tabella da la quarta liga. La squadra ha gudagnà tschintg da las emprimas sis partidas, in gieu è ì a fin cun in pari.
Schi funcziuna, alura funcziuni
Per il mument è il CB Schlarigna sin ina vaira unda da success. Dapi ditg n'è la squadra engiadinaisa betg partida uschè bain en ina stagiun sco quest atun. Il CB Schlarigna n'ha anc pers gnanc in gieu e salida actualmain da la testa da la tabella. Per Schlarigna è quai da gronda impurtanza da rimnar puncts gia uss durant la runda d’atun. Peril solit mussa la squadra alura la primavaira autras prestaziuns. Quai ha segira era da far cun l’atgna plazza da ballape San Gian. La primavaira dovra quella pervia da las temperaturas e la naiv il pli ditg per esser pronta. Perquai ha il CB Schlarigna da dar las emprimas partidas da la runda da primavaira adina ordaifer.
