Alex Fiva vegn pli probabel a terminar sia carriera la fin da questa stagiun. En quella vul il skicrossist dentant anc ina giada cumbatter per ina medaglia olimpica, quai lura en la vegliadetgna da 40 onns. Il siemi fiss aur olimpic – il sulet che manca anc en ses palmarès. A Peking avevi il 2022 dà argient. Vitiers è Fiva daventà il 2021 ad Idre, en Svezia, campiun mundial ed en la Cuppa mundiala è el stà 14 giadas sisum il podest.
Il debut en la Cuppa mundiala aveva Alex Fiva – ch’è burgais dubel svizzer-american – dà il 2008, pia avant passa 17 onns. Ils gronds success ha il Grischun però festivà pir ils ultims onns. Uschia vegn el savens era titulà sco «Oldie but Goldie».
Era Gantenbein vul far furora a Livigno
D’ina medaglia olimpica siemia era Talina Gantenbein da Scuol. Per ella vegn la cursa dals 20 da favrer ad esser la pli impurtanta da la carriera. Quai cunzunt era perquai che questa cursa olimpica ha lieu per ina giada quasi avant isch-chasa. La sportista engiadinaisa da 27 onns emprova dentant era da finalmain gudagnar ina cursa da la cuppa mundiala – fin uss è ella vegnida ina giada segunda e sis giadas terza.
Talina Gantenbein guarda cun optimissem vers la stagiun olimpica, quai malgrà ch’ella ha stuì magunar l'ultim onn inqual frida. Il schaner era ella cupitgada en il Canada e perquai gì ina pulita scurlada dal tscharvè. E durant la stad ha ella lura era gì problems cun il dies. Ma dapi che Gantenbein è puspè sin ils skis e po trenar sin la naiv, sajan ils problems da sanadad sco svanids. Ella saja fitta e pronta per la stagiun olimpica.