Las dunnas da Tusaun Cazas han gia gudagnà diversas giadas la Cuppa grischuna. Il mument èn ellas las dunnas grischunas che giogan en la segunda liga ed uschia en la pli auta liga. L'istorgia da la ballapedistas da Tusaun Cazas cumenza dentant avant passa 30 onns. In pèr dunnas han fundà ina equipa ed èn uschia stadas ina da las emprimas squadras da la Svizra orientala.
Marinho Caminada, ch'è uss gia il terz onn president dal club, è superbi dal club e spezialmain dal ferm moviment da dunnas e mattas ch'el ha. Que moviment saja per el ina consequenza logica d'ina lavur permanenta dals responsabels. E betg be quai, i munta er che las ballapedistas da Tusaun Cazas èn la meglra squadra en il Grischun.
Nov è ussa però ch'i dat pliras squadras mo cun mattas. Avant eri uschia ch'i deva gruppas masdadas, ma Caminada declera er ch'i dat adina dapli mattas che vulan giugar ballape, ed er che bleras giuvnas vulan plitost trenar mo cun autras mattas. Quai haja da far cun la dinamica en las differentas squadras, specificamain en quella vegliadetgna.
Tecnicamain èn las mattas tuttina fermas sco ils mats da la medema vegliadetgna.
Ch’ins haja uss gruppas da trenament mo cun mattas saja en mintga cas in gudogn per tuts.
Caminada di er, ch'i saja cler, ch'il campiunadi «Womens Euro» da l'onn passà en Svizra haja purtà singulas giuvnas er en lur club – ma la lavur haja cumenzà gia bler pli baud. Impurtant saja uss er ch'ins haja finalmain atgnas gruppas da trenament cun sulettamain mattas. En quest connex saja er impurtant l'engaschament da la federaziun grischuna da ballape.