9 gieus e 9 victorias. Las ballapedistas sursilvanas domineschan il campiunadi da 4. liga, e quai a moda impressiunanta. Quai mussa er la statistica da gols. Fin uss han ellas sajettà 42 gols ed incassà be trais gols. D’ina promoziun en ina liga pli auta n’ha nagin pli dubis, memia gronda la differenza tranter il Team Surselva e las ulteriuras equipas en questa liga.
Cun ina media da vegliadetgna da strusch 22 onns ha il team dals trenaders Bea Caduff-Seiler, Reto Caduff e Corsin Cavegn a disposiziun ina squadra fitg giuvna ch’empermetta er bler per l’avegnir. Actualmain dumbra il cader 25 dunnas. Plinavant vegn l’equipa rinforzada en l’avegnir d’Anja Furger, la Lumneziana ch’ha giugà fin l’onn passà tar il FC Lucerna en la Womens Super League, la pli auta liga svizra da ballape.
Questa stagiun spetgan anc quatter rundas da campiunadi. Il proxim gieu dat il Team Surselva la dumengia, ils 18 da matg a las 16:00 uras a Schluein encunter il FC Tusaun/Cazas ch’ha gudagnà be in sulet gieu fin uss. Las Sursilvans èn pia cleramain las favuritas e cun in’ulteriura victoria pudess il schampagn per la promoziun en 3. liga definitivamain vegnir mess a frestg.
Campiunadi dunnas 4. liga
Fotografia dal Team Surselva da la dunnas
Retscha davant da san. Lucia Seiler, Jana Caduff, Ladina Carigiet, Martina Beeli, Vera Krämer, Mara Blumenthal, Flurina Carigiet, Danja Cavigelli e Luzia Tschuor. Retscha amez da san. Anna-Lena Dolf, Jasmin Bearth, Lya Berni, Sina Demont, Ronja Muoth, Laura D’Atria, Lorena Spescha e Valentina Albin. Retscha davos da san. Reto Caduff (trenader), Anja Furger, Chiara Lorena Cavegn, Romina Cavegn, Laura Casanova e Bea Caduff (trenadra). Sin la foto mancan Selina Tomaschett, Silja Montalta, Lina Rieder, Andrina Cathomen e Corsin Cavegn (trenader).