Siglir tar il cuntegn

Header

cuntegn

Ballape regiunal CB Trun/Rabius gudogna gieu chapital

In’emna suenter la victoria da 3:1 ordaifer encunter Eschen/Mauren ha il CB Trun/Rabius er battì il FC Buchs. Ils da Trun ha gudagnà questa gieu a chasa cun 3:1. Avant pausa ha Lucas Maissen manà ils Sursilvans cun 1:0 en avantatg. Suenter il 2:0 entras Gianin Derungs ha Buchs pudì scursanir curt avant la fin. Paucas minutas pli tard ha Daniel Pfister però decidì il gieu cun il 3:1.

audio
CB Trun/Rabius sin buna via da mitschar
ord Actualitad dals 30.05.2023. Maletg: MAD
laschar ir. Durada: 4 minutas 4 Secundas.

Relegaziun è pli probabel giud maisa

Grazia a las duas victorias en seria ha il CB Trun/Rabius pudì far in pass enavant sin il 7avel plaz da la tabella cun 19 puncts, 7 puncts dapli che Buchs che sa chatta vinavant sin il plaz da relegaziun. Tenor la tabella è Trun/Rabius uschia mitschà da la relegaziun duas rundas avant la fin dal campiunadi. La Federaziun ponderescha dentant da far intginas midadas en las ligas regiunals uschia ch’i n’è anc betg cletg sche be ina u schizunt duas equipas vegnan relegadas en la quarta liga. Cun in punct en il davos gieu da campiunadi a chasa encunter Landquart pudess Trun/Rabius dentant far definitiv tut cler.

Tabella 3. liga regiunala da ballape

Avrir la box Serrar la box

Link tar Federaziun da ballape

Puspè motiv da far festa

Suenter la victoria da glindesdi Tschuncaisma cunter Buchs ha il CB Trun/Rabius cun raschun puspè gì motiv da far festa. La runda da primavaira n’è ditg betg ida sco giavischà. Durant ils emprims set gieus dapi la fin mars vevi dà trais paris e quatter terradas. Als da Trun ha dentant er il cletg mancà en questa stagiun. Set dad indesch gieus ha l’equipa numnadamain pers cun be in gol differenza. Plinavant ha l’equipa da Clau Berther er gì da sbatter cun blessuras. Plirs giugaders da tschep en sa blessads las davosas emnas e n’han uschia betg pudì gidar l’equipa.

CB Trun gegen Buchs – Regionalfussball
Legenda: FMR

USSI na po betg suenter a Valposchiavo Calcio

L'US Schluein Glion sto plaunet sutterrar il siemi da far il pass en la 2. liga, nun che la Federaziun fetschia diversas midadas en las ligas regiunalas e lascha uschia ir si duas equipas. Duas rundas avant la fin dal campiunadi en la terza liga ha Schluein Glion vinavant tschintg puncts dischavantatg sin Valposchiavo Calcio. La fin d'emna da Tschuncaismas han omaduas equipas gudagnà. L'USSI ha battì ordaifer l'equipa da Schaan cun 3:0 grazia a gols da Marino Cavegn, Lars Caduff e Serafin Bundi. Valposchiavo Calcio ha battì a chasa Ruggell cun 4:1. Plinavant ha il Club da ballape da Domat pers a chasa encunter Triesen cun 0:1.

Cuira e Domat gudognan

En la segunda liga interregiunala ha Cuira 97 battì Lachen/Altendorf a chasa cun 2:0 ed en la segunda liga regiunala ha Domat battì a chasa Au-Berneck cun 4:1.

Tabella 2. liga interregiunala da ballape

Avrir la box Serrar la box

Link tar Federaziun da ballape

RTR novitads 20:00

Artitgels legids il pli savens