Success istoric per Valposchiavo Calcio
18 onns suenter il davos ed unic intermezzo da Valposchiavo Calcio en segunda liga da ballape turna l’equipa dal Grischun dal sid puspè en segunda liga. Valposchiavo Calcio ha gudagnà la penultima partida dal campiunadi en terza liga ordaifer cun 3:1 cunter Eschen/Mauren. Uschia as curuna Valposchiavo Calcio cun il titel da campiun, al medem mument è quai era la promoziun en segunda liga. Quasi davent da l’entschatta era Valposchiavo Calcio a la testa da la tabella e la squadra dal trenader Luigi Zugnoni ha tratg atras quai. Il nov trenader ha implementà a l’equipa il gen da vulair gudagnar adina il proxim gieu. Quai è gartegià. Durant l’entira stagiun ha Valposchiavo pers fin uss mo trais partidas. La squadra è propi stada sur tut la durada la meglra equipa. Cun la victoria ad Eschen/Mauren fa Valposchiavo tut cler. La davosa partida a chasa cunter Buchs po la squadra mo pli giudair.
Ils ulteriurs gieus da la terza liga:
Il CB Trun/Rabius ha pers ordaifer cunter il FC Schaan cun 1:4. Avant la davosa runda èn els uschia sin plazza 7 da la tabella. Era da oz ha l'equipa da Domat, quels perdan cun 2:5 encunter il FC Ruggell. L'US Schluein Glion ha gudagnà sia partida ordaifer cunter il FC Landquart cun 3:1 e Tusaun Cazas ha pers cunter il FC Buchs cun 0:1.
2. liga regiunala
En la segunda liga regiunala ha il CB Domat a chasa fatg pari 1:1 cunter l'FC Herisau. Uschia fa Domat cun 35 puncts il sigl dal plaz 5 sin il plaz 3 da la tabella.
2. liga interregiunala
En la segunda liga interregiunala ha Cuira 97 pers venderdi ordaifer cunter Frauenfeld – cun 2:3. Cuira resta cun 40 puncts sin plaz 5 da la tabella. Per Frauenfeld èn ils trais puncts fitg impurtants – en il cumbat cunter la relegaziun.
