Ils resultats en la preparaziun per la nova stagiun da biatlon empermettan bler. Eligius Tambornino ha mussà als tests a Magglingen uschè buns resultats sco anc mai. Ed er en la qualificaziun interna per las emprimas cursas da la cuppa mundiala a Kontiolahti en Finlanda ha il Sursilvan persvadì.
En l'Arena da biatlon a Lai ha el laschà tut ses collegas d’equipa davos el, er il leader vallesan Benjamin Weger. Uschia è Tambornino sa qualifitgà suveran per l’emprima staziun da la cuppa mundiala en questa stagiun a Kontiolahti. A chasa sto percunter star l’auter sursilvan, Serafin Wiestner da Trin.
Er grazia als impuls dals dus novs trenaders spera Eligius Tambornino da parter regularmain en la cuppa mundiala. La gronda finamira a lunga vista èn ils proxims gieus olimpics il 2022 a Peking. Enfin lura vul il sportist da 34 onns en mintga cas restar fidaivel al biatlon.