Siglir tar il cuntegn

Header

Foto da la schanza 2021
Legenda: Keystone
cuntegn

Preparaziuns per il Big Air Spargnar energia e resister al vent

Il sigl è pront, las chazzolas da la tribuna funcziunan e las frestgeras da las bars èn plainas. Ina visita tar l’Obere Au, per guardar co che las preparaziuns per il Big Air Cuira èn stadas e tge mesiras ch’ils organisaturs han prendì per spargnar energia.

Producir naiv tar 20 grads, ina tribuna gigantica cun glisch ed autpledaders, ina massa autos e maschinas per bajegiar si tut, trais tendas da festa e massa frestgeras per da baiver.

Il Big Air a Cuira è ina gronda occurrenza cun bunamain 30’000 aspectaturas ed aspectaturs. Ils responsabels sco era la citad da Cuira sajan pertscherts da lur responsabladad, di Roland Hemmi, il schef dil stab da crisa da mancanza d'energia da la citad.

Mesiras per reducir il diever d'energia

Ils organisaturs prendan differentas mesiras per reducir il diever d’energia. Tranter auter vegn la naiv quest onn producida cun schelar aua da baiver da Cuira e lura manizzar ella en tocca, enstagl da chanuns da naiv. Vinavant vegn quest onn era duvrà il glatsch che vegn mintga di schubregià e glimà or da las hallas da Cuira. Quest glatsch fa ora radund 10% da tut la naiv che vegn duvrada per il sigl, dian ils organisaturs. In’autra mesira per reducir energia è da scursanir ils dis da trenament per las atletas ed ils atlets e da far quels be in e dus dis avant l’event, uschia ch’ils organisaturs han stuì producir damain naiv.

audio
Mesiras per spargnar energia
ord Actualitad dals 21.10.2022. Bild: RTR
laschar ir. Durada: 3 minutas 17 Secundas.

Mesirar l’energia

Quintà ensemen ha il Big Air duvrà l’onn passà 2,58 uras kilowatt per persuna per di. Con damain ch'i duai vegnir quest onn, saja grev da dir ordavant, di Roland Hemmi. Per dentant savair quintar quai meglier per il Big Air 2023, vegn quest onn mesirà tar mintga part dal festival, tge che dovra con bler energia:

Per savair tge che maglia uschè blera energia u tge eba betg.
Autur: Roland Hemmi manader stab da crisa mancanza d'energia Cuira

En general sappian ins dentant dir, che l’entir event dovra per di 0,5% da tut l'energia che vegn duvrada a Cuera durant quels dis.

Annullar il Big Air è mai stà tema

Da tuttina annullar il Big Air è da la vart da la citad da Cuira mai stà in tema. La finala era, perquai che la citad n’avess gnanc la basa legala per far quai, damai ch’ils contracts èn schon suttascrits. Be il chantun u la Confederaziun avessan pudì scumandar l’occurrenza, sumegliant sco tar il coronavirus.

La finala èsi uschia che la citad da Cuira dat be il plaz e las circumstanzas per pudair far quest event.
Autur: Roland Hemmi manader stab da crisa mancanza d'energia Cuira

Preparaziuns senza incaps

Uschia è uss tut pront a l’Obere Au. Las preparaziuns per il Big Air sajan tuttas idas sco planisà, di il responsabel dals organisaturs dal Big Air, René Götz.

audio
Sfidas tar las preparativas
ord Actualitad dals 21.10.2022. Bild: RTR
laschar ir. Durada: 3 minutas 17 Secundas.

Il sulet che haja fatg in zichel mal il venter saja stà il vent. Pertge lez ha l’onn passà buffà davent tut la naiv sisum la rampa dal sigl. Per quest onn han els perquai gia producì ordavant in zichel naiv per quest cas. Vinavant è era l’urari cun il plan da partenza vegnì adattà. Il suentermezdi cura ch’il vent duai buffar il pli fitg, entschaivan ils concerts, e cura ch’i duai puspè esser pli ruassaivel èn lura ils finals da skis ed aissa.

RTR actualitad 07:00

Artitgels legids il pli savens

Scrollar a sanestra Scrollar a dretga