Siglir tar il cuntegn

Header

Silvano Gini
Legenda: Silvano Gini (20) da Champfèr en l'Engiadin'Ota mad
cuntegn

Campiunadi mundial juniors Silvano Gini: «Igl è stà super cool»

Malgrà ch’il campiunadi mundial da skis dals juniors a St. Anton en l’Austria n’è betg ì a fin sco giavischà guarda Silvano Gini enavos cun in bun sentiment sin quest punct culminant da la stagiun. Per il giuven skiunz da 20 onns èsi numnadamain stà l'emprim campiunadi mundial da la carriera.

audio
Discurs cun Silvano Gini sur dal campiunadi mundial da skis juniors
ord Actualitad dals 23.01.2023. Maletg: RTR
laschar ir. Durada: 8 minutas 14 Secundas.

Il punct culminant è stà il plaz da top 10 en il super-G. En questa cursa, nua che passa la mesadad dals participants èn crudads ora, è Silvano Gini vegnì 9avel. Il di avant avevi tanschì per il 23avel plaz en la cursa rapida. En sia disciplina da parada, il slalom gigant, ha Gini dentant stuì sutterrar il siemi d’ina medaglia gia curt suenter la partenza. Suenter in sbagl è il giuven skiunz rumantsch crudà ora suenter paucas secundas.

Per Silvano Gini èsi stà ina scola da la vita. El haja pudì rimnar bleras e bunas experientschas a quest campiunadi mundial a St. Anton. Ed er grazia als success dals Svizzers e collegas d'equipas ch'han gudagnà gist set medaglias ils emprims dis saja stà in fitg bun temp en il Tirol. L’atmosfera e la chemia saja stada fitg buna entaifer l’equipa.

Sustegn da la famiglia

Bel saja er stà che sia famiglia haja fatg il viadi a St. Anton per sustegnair el tar sias emprimas grondas cursas internaziunalas, uschia Silvano Gini. Ussa saja da trenar vinavant, sperar da restar saun ed er avair in zic il cletg per ch’i tanschi da cuntanscher in di il grond siemi d’astgar parter ina giada en la cuppa mundiala da skis ed uschia concurrenzar cun ils gronds, cun la crème de la crème, di Silvano Gini, ch'è cun ses 20 onns anc a l'entschatta da la carriera.

Actualitad 17:00

Artitgels legids il pli savens

Scrollar a sanestra Scrollar a dretga