Ils Svizzers persvadan vinavant al campiunadi mundial da skis dals juniors a St. Anton en l’Austria. En il super-G dals umens hai schizunt dà ina victoria dubla per ils skiunzs da Swiss Ski. Livio Hiltbrand ha gudagnà aur avant Lenz Hächler (+0,03 secundas). Terz è vegnì Vincent Wieser (+0,11 secundas) ch’ha uschia gudagnà l’emprima medaglia per l’Austria a quest campiunadi mundial. Livio Hiltbrand aveva gia gudagnà bronz en la cursa rapida il di avant.
Ina buna prestaziun ha er il Grischun Silvano Gini mussà. Il Rumantsch da 20 onns oriund da Champfèr è vegnì 9avel cun in retard da 0,71 secundas sin ses cumpatriot e nov campiun mundial Livio Hiltbrand. La dumengia spetga lura anc sin Silvano Gini il slalom gigant, sia disciplina da parada.
Suenter aur datti argient per Grob
Be 24 uras suenter il titel da campiunessa mundiala en la cursa rapida gudogna Stefanie Grob la medaglia d’argient en il super-G al campiunadi mundial dals juniors a St. Anton en l’Austria.
L’Appenzellaisa da 18 onns ha pers 0,65 secundas sin Lara Colturi, il grond talent da l'Italia da 16 onns che parta dentant per l’Albania. Cumplettà il podest sco terza ed uschia gudagnà bronz ha la Taliana Alice Calaba (+0,72 secundas).