Siglir tar il cuntegn

Header

audio
Carlo Janka: «Gì davent da l'entschatta in bun sentiment»
Or da Actualitad dals 20.12.2022. Maletg: RTR, Georgina Janki
laschar ir. Durada: 3 minutas 54 Secundas.
cuntegn

Carlo Janka La vita suenter la carriera da skis

Prest èsi in onn dapi che Carlo Janka ha terminà sia carriera da skiunz. En quest onn è el vegnì ina segunda giada bab ed ha mess sin via, ensemen cun sia dunna Jenny, ina pratica da coaching en ils secturs sport, sanadad e nutriment.

Da la pista da skis en la pratica da cussegliaziun e trenader da cundiziun. Quai è ditg grop la vita da Carlo Janka suenter sia carriera da skiunz ch'è stada curunada da success (campiun olimpic, campiun mundial, victur dal classament general da la cuppa mundiala), dentant era stedi da problems da sanadad. Janka ha en ses temp sco skiunz adina er tschertgà ed empruvà terapias alternativas. Uss dat el vinavant sias experientschas.

Dal temp da profi na manca nagut

A Glion han Carlo Janka e sia dunna Jenny installà ed avert dacurt lur pratica «Janka Coaching». Quai cun la finamira da sustegnair ed elavurar schliaziuns individualas en ils secturs sport, sanadad e nutriment. E quai per in e scadin. Plinavant è Carlo Janka dapi la stad trenader da forza e cundiziun dad in talent da skis da la regiun: Gino Stucki da Flond ch'è en il cader C da Swiss Ski.

La dretga decisiun il dretg mument.
Autur: Carlo Janka anteriur skiunz ed actualmain interprendider

El na saja betg crudà en questa ominusa rusna suenter la fin da la carriera da profi-sportist, raquinta Carlo Janka. I saja stà la dretga decisiun il dretg mument. Tge ch'ina vita sco sportist da professiun muntia haja el pir encurschì cura che quest burdi saja crudà davent. Dasper fundar la pratica da coaching e cumenzar a generar clientella ha Carlo Janka en ses emprim onn sco na-skiunz surtut giudì d'avair temp per ses dus uffants.

RTR actualitad 17:00

Artitgels legids il pli savens