Cun in penalti ha Anja Furger manà il Team Surselva anc avant pausa cun in 1:0 en l'avantatg. Strusch che la segunda mesadad ha cumenzà, ha Zenia Obhof pudì egualisar per Domat. Salome Roher e Romina Cavegn han lura, curt avant la fin da la partida, sajettà ils gols decisivs per il Team Surselva che sa chatta da nov sin il segund plaz da la tabella – quai cun 29 puncts, pia be 5 puncts davos il prim-plazzà FF Toggenburg. Domat da l’auter maun resta sin il 7avel plaz cun 22 puncts.
Il derbi tranter Domat ed il Team Surselva è il sulet derbi tranter dus clubs grischuns en la terza liga ch’han fin avant in onn anc collavurà fitg stretg ensemen. Il plaschair e la motivaziun per quest duel è uschia mintgamai grond. Suenter il gieu na regia però nagina rivalitad, era perquai che bleras da las giugadras enconuschan bain ina a l’autra.
Resultats e tabella
Fertant che Domat sto anc pir dumagnar da far in pass da scala si en la tabella ils proxims gieus, po il Team Surselva vinavant sperar sin la promoziun en la segunda liga. Plinavant dattan las Sursilvanas anc il final da la Cuppa grischuna la gievgia d’Ascensiun, ils 14 da matg – quai encunter Tusaun/Cazas, la pli ferma equipa grischuna da dunnas che dat en la segunda liga.