«Dar ballape è il meglier sport d'equipa ch'i dat», ha in visitader manegià sonda sin la plazza da ballape a Vella. Là ha il CB Lumnezia envidà la populaziun al giubileum da 25 onns. L'um sin ils onns che ha ludà il ballape sco part impurtanta dal temp liber n'è betg stà il sulet da questa opiniun.
Currer suenter a la culla
Durant il suentermezdi ha in auter visitader raquintà a la FMR co el stueva pli baud dar ballape cun ses frars e co els gievan dumengia per dumengia dad in turnier da grümpel a l'auter. I eran ils onns ch'ins aveva liber mo la dumengia, e visitar in grümpel era insatge fitg popular. Ils babs n'avevan dentant betg uschè gugent ch'ils mattatschs e las mattas s'absentavan per ir a currer suenter ad ina balla u – sco ils Lumnezians dian – ina culla.
Enfin ils onns tschuncanta na devi en ils vitgs da muntogna nagut auter che lavurar u emigrar. Temp liber n'enconuschevan ins betg. La generaziun giuvna ha dentant cumenzà a sa lubir in pau temp liber. Ins ha cumenzà ad ir cun skis e dar ballape. Ed a fundar uniuns e clubs.
In turnier per e cun pitschen e grond
Talas reminiscenzas n'ha nagin nudà. Igl èn remartgas ch'ins auda en discurs cun glieud che ha passa 60 onns. Oz è ballape dapertut il sport il pli popular – uschia era en Lumnezia. Ed oz sa chapeschi da sasez che mattas dattan era ballape. Sonda èn mattatschs e mattas sa participads al program festiv da 25 onns CB Lumnezia. Ils organisaturs han purschì in turnier per pitschen e grond, ustaria cun grilladas, sco era gieus d'inschign cun la balla. Aposta per la festa ha il club montà ina tenda.
Che ballape saja il sport d'equipa il pli popular è stà il motto dal di. A las 10:00 ha il turnier per pitschen e grond cumenzà. Ils organisaturs avevan furmà las equipas cun geniturs ed uffants che han dà ensemen. In gieu cun duas equipas ha durà mintgamai 15 minutas.
In sulet na po betg gudagnar
Suenter il final dal turnier ha la festa cuntinuà cun in gieu da las «legendas». Ils dus rivals d'antruras che giugavan campiunadi, il CB Vella ed il CB Degen resp. CB Lumnezia, han dà in «derby». Sin la plazza a Vella èn las rivalitads daditg emblidadas e la fusiun ha nudà anc pli ferm ils lioms. Oz è il CBL ina squadra cun glieud da Vrin enfin a Cumbel. L'uniun dumbra actualmain 40 commembers activs, 50 juniors e radund 1000 passivs. Il club s'engascha per ina purschida che fa senn.
Sco ils uffants lumnezians van oz a scola ensemen, fan els era sport ensemen, saja sin skis, sin la plazza da ballape, cun velo u auters sports. Il motto dal club da ballape CBL è significativ: plaschair – respect – success. Ch'il sport da ballape saja il meglier sport d'equipa laschan ils adherents da hockey u d'autras disciplinas sa chapescha betg valair. En mintga cas è ballape il sport popular il pli derasà sin il globus.
Ins n' emprenda betg mo da gudagnar, mabain era da sperder, da cooperar e respectar. In giugader persunal na sa betg gudagnar. Il club lumnezian porscha dapi questa primavaira ina spezialitad per sasez: Fabiana Capaul tegna numnadamain enta maun, sco presidenta, las hottas dal CBL.