Actualmain è exact ina dunna en l'uffizi sco presidenta d'in club da ballape en il Grischun. Tenor la Federaziun da ballape da la Svizra orientala (OFV) ha mo il CB Lumnezia ina dunna en quest uffizi. Fabiana Capaul è schizunt l'emprima presidenta d'in club da ballape en la Surselva. Quest svilup fa plaschair, di l'assistenta da medi da 33 onns.
Quai è schon anc spezial – ed ina onur da pudair far quella lavur. Ballape era uschiglio plitost insatge d'umens. Igl è bel ch'ins dat era la fidanza a dunnas.
Fabiana Capaul è l'unica dunna en la suprastanza dal CB Lumnezia e sa chatta plitost en ina domena masculina. Quai na senta ella dentant insumma betg. Ella enconuscha ses consuprastants schon dapi blers onns, la schlattaina n'è mai stada in tema.
Quest onn sa fatschenta Fabiana Capaul sco nova presidenta surtut a cun dus gronds eveniments: la festa da giubileum da 25 onns dal CB Lumnezia e la planisaziun d'in nov plaz da ballape a Vella. Temp per sustegnair ses club preferì las fins d'emna vegn ella tuttina anc ad avair. Ed er da sezza dar ballape in zic.
Sco mattatscha haja l'assistenta da medi adina dà ballape cun ils buobs – e sa sentiva bain. Uschè bain ch'ella ha chalà da dar ballape cura ch'ella avess stuì cumenzar a dar ballape cun autras mattatscha.
-
Bild 1 von 2. Il pli gugent ha Fabiana Capaul (retscha davant, segunda da sanester) dà ballape cun ils mats. Bildquelle: MAD.
-
Bild 2 von 2. Ballape ha Fabiana Capaul er savens dà cun ses frar sin la terrassa da la chasa. Bildquelle: MAD.
Fabiana Capaul stat oz tuttina bunamain mintga fin d'emna sin in plaz da ballape. Quai dentant sco aspectatura.
Dal CB Lumnezia guard jau sche pussaivel mintga gieu. Segir tut quels ch'els dattan a chasa ed era ordaifer sch'jau n'hai betg auters plans.
Ina pitschna fanatica da ballape saja ella schon, surtut dal CB Lumnezia, uschia l'assistenta da medi. Ella sa gidia gugent cun ses club preferì ed ha ord quel motiv surpiglià il presidi cura ch'els han dumandà ella.
Il CB Lumnezia è numnadamain schon dapi in temp vi da tschertgar ina nova persuna per quest uffizi, damai che l'anteriur president aveva chalà or da motivs da sanadad.
Jau dun anc ballape. Simplamain en halla cun l'uniun sportiva. E quai era mo cun umens. Jau sun crai schon adina stada quel tip che dat gugent ballape cun ils umens
Il CB Lumnezia ha chattà ina nova persuna per ses presidi. Che quai è questa giada ina dunna è tenor la nova presidenta in fatg cumplettamain secundar.