Sut il motto «Dunnas en il ballape – vegnidas per restar» han radund 1'000 giugadras da l'entira Svizra ed intginas da la Germania, participà a l'eveniment a l'Obere Au a Cuira. Ultra da las activitads sin las 9 plazzas da gieu, ha era gì lieu in forum en l'aula da la nova scola Fortuna. Radund 120 persunas han visità referats e reflectà l'Euro da ballape da las dunnas da questa stad e strategias per promover il ballape feminin.
-
Bild 1 von 2. Er il mascottin uffizial da la UEFA Women's EURO 2025, Maddli, in giuven chaun San Bernard, numnà suenter l'emprima ballapedista licenziada da la Svizra, Madeleine Boll è stà da la partida al «Di mundial dal ballape da mattatscha» a Cuira. Bildquelle: RTR.
-
Bild 2 von 2. Sin las plazzas da ballape a l'Obere Au han var 1'000 mattatschas, giuvnas e dunnas giuga ballape durant il «Di mundial dal ballape da mattatschas», sonda ils 11 d'october 2025. Bildquelle: RTR.
Jennifer Wyss, ballapedista, trenadra da junioras e promotura da ballape da dunnas e mattatschas tar l'Associaziun da ballape da la Svizra Orientala, ha constatà in effect positiv da l'Euro:
Dapi l'annunzia che l'Euro 2025 haja lieu en Svizra, avain nus vis in augment da 56% da giugadras en ils clubs grischuns.
L'Euro haja augmentà la visibilitad dal ballape da dunnas en Svizra. I vegnia discurrì e scrit dapli davart il ballape da dunnas. Quai saja stà in bun cumenzament, «ma ussa stuain nus cuntinuar cun questa euforia», uschia Jennifer Wyss.
«Equal pay» ed «equal play»
Per bleras participantas na mesiran ins l'egualitad en il ballape betg mo en terms da paja, ma era en terms da schanzas egualas, promoziun, infrastructura e sponsoring. Ellas sa giavischan che las mattatschas hajan las medemas pussaivladads sco ils mats en tut ils aspects dal gieu.
Claus Caluori accentuescha che l'Associaziun da ballape grischuna lavura per promover il ballape da dunnas e buobas, er a nivel d'elita. In studi da la FHGR è actualmain en elavuraziun per sviluppar mesiras concretas per augmentar la participaziun da mattatschas e dunnas en il ballape. Cun emprims resultats saja i da quintar il december 2025.
Or da l'archiv
«Buobas duessan sautar u far acrobatica empè da ballape»: Uschè pregiudizis han tranter auter inspirà la trenadra Adeline Berther dad organisar la stad passada trenaments mo per buobas. Uschia duai l'energia dal campiunadi europeic vegnir purtà en Surselva.