La davosa giada ha Valposchiavo Calcio gudagnà l’onn 2022 la trofea da la cuppa grischuna da ballape. Lezza giada aveva l’equipa dal Grischun dal sid gudagnà il final da la cuppa grischuna encunter Moesana Calcio ed era uschia daventada la squadra la pli ferma dal ballape en il Grischun. Sco l’onn 2022 vul Valposchiavo Calcio era far valair questa primavaira encunter l’Uniun Sportiva da Schluein Glion.
Schluein Glion è defensur dal titel
Per Valposchiavo Calcio è il duel encunter l'Uniun Sportiva da Schluein Glion ina partida ch'ins enconuscha. Gia il 2023 era il duel Valposchivo Calcio vs. Schluein Glion la partida da final da la cuppa grischuna. Lura aveva Valposchiavo Calcio pers il duel encunter l’equipa sursilvana. Cler che Valposchiavo Calcio vul perquai prender questa giada revantscha.
Rotaziun cun ils giugaders
Las emnas nua che las equipas dattan anc partidas da la cuppa da ballape grischuna èn intensivas. La fin d'emna vegn dà il gieu da campiunadi, e durant l’emna anc ina partida da la cuppa grischuna. Questas emnas cun gieus en differents campiunadis numnan ins emnas englaisas.
Per ch'ils giugaders na vegnan betg strapatschads damamia, rotescha Valposchiavo Calcio ses giugaders. Vul dir, betg adina la medema equipa dat las partidas da campiunadi en segunda liga e durant l’emna ils gieus da la coppa grischuna.