Las ballapedistas da Tusaun-Cazas (2. liga) gudognan il final da la Cuppa grischuna 2026 encunter il Team Surselva (3. liga) cun 2:0. Uschia turna il buccal, suenter in onn pausa, puspè enavos a Tusaun.
Per la 11avla giada va il titel da la Cuppa Grischuna a Tusaun-Cazas. Per la differenza ha la fin finala Melina Baumberger procurà cun dus gols en l'emprima mesadad. Curt avant igl 1:0 per l'equipa da Tusaun en la 14avla minuta avessen las Sursilvanas dentant giu la gronda occasiun d'ir en avantatg entras in penalti. L'attatgadra Mara Blumenthal ha dentant mess il bal sper la petga vi.
En la segunda mesadad ha il Team Surselva, ch'è stà per l'emprima giada en il final, bain empruvà tut da crear acziuns offensivas, propi malsegir èsi dentant vegnì mo darar. Tut en tut èsi stà in final guliv, fetg cumbattì e fair, nua che spezialmain la rutina da l'equipa da Tusaun-Cazas e Melina Baumberger han fatg la differenza.
In final plain tensiun è er garantì tar ils umens
Valposchiavo Calcio mussa in campiunadi excellent en la 2. liga regiunala e giascha il mument sin il quart plaz. Da 21 gieus en questa liga ha l'equipa dal Grischun dal Sid pers mo tschintg fin uss. D'Ascensiun frunta Valposchiavo Calcio sin il defensur dal titel da la Cuppa grischuna da l'onn passà, Schluein Glion. L’equipa da la Foppa è il mument sin l'emprim rang en 3. liga cun bunas schanzas da far il pass si en la 2. liga. Dals 16 gieus da campiunadi fin uss ha ella gudagnà 13.
Il final da la Cuppa grischuna tranter Valposchiavo Calcio e l'US Schluein Glion è nagut nov. L'ultima giada hai dà quest final il 2023, cura che las duas equipas eran rivals en 3. liga. La meglra fin en quest final avant trais onns hai dà per la USSI ch'ha triumfà 3:1.
Ma cunquai ch'ils Puschlavins èn en il fratemp daventads in top-team en la 2. liga regiunala, cun divers novs giugaders, van els segir sco favurits en quest final.