Andrin Beeli da Sagogn ha gudagnà l'Engadin Bike Giro da quest onn, ina cursa da mountainbike cun in prolog e trais etappas en la regiun da San Murezzan.
Beeli ch'è vegnì en l'etappa finala terz ha la finala triumfà en il classament general avant Fadri Barandun. L'Engiadinais ha pers tut en tut 3:11 minutas sin il Sursilvan. Beeli e Barandun eran era sa participads ensemen al Cape Epic en l'Africa dal Sid e vegnan era ad ir communablamain a la partenza dal Swiss Epic che cumenza mez avust a Lai.
Cumplettà il podest sco terz tar ils umens d'elita a quest Engadin Bike Giro ha Sascha Weber cun in retard da 9:32 minutas.
Tar las dunnas ha triumfà la Tudestga Adelheid Morath. Meglra svizra è stada Jacqueline Schneebeli sco 7avla cun in retard da bunamain in'ura.
