Festa per Nadja Kälin - San Murezzan è stà spalier per Nadja Kälin

Il Club da skis Alpina San Murezzan, il center da trenament Engiadina Nordic, ed il cumin da San Murezzan han clamà – e la gronda massa è vegnida per far festa sin las duas medaglias olimpicas da la giuvna passlungista Nadja Kälin. Passa in mais suenter ses gronds success tar ils Gieus olimpics a Milano e Cortina è Nadja Kälin vegnida retschavida a San Murezzan. En la sala d’events da la Laudinella è San Murezzan per uschia dir stà spalier per l’emprima passlungista svizra che ha gudagnà tar ils Gieus olimpics ina medaglia singula.

Cumenzament sin ils skis e sin ils skis da passlung

Las emprimas experientschas sin lattas da skis ha Nadja Kälin fatg cun skis alpin. Bain prest è ella dentant vegnida unfisa da far stortas, uschia ch’ella ha midà da matta sin ils skis da passlung. En il club da skis Alpina San Murezzan ed en il center da trenament dad Engiadina Nordic ha ella alura fat sia emprimas experientschas. Gia en giuvens onns tutgava Nadja Kälin tar las pli spertas. Uschia èn vegnids blers anteriurs trenaders e sa chapescha er collegas da squadra a la festa da bainvegni per Nadja Kälin.

Festa da bivgnaint per Nadja Kälin

Inscunter da bleras fatschas enconuschentas

Sper Nadja Kälin èn era quasi tut ils olimpionics engiadinais ch’eran da la partida tar ils Gieus olimpics a Milano e Cortina vegnids beneventads. Tranter quels per exempel l’equipa da bob da Cédric Follador da Bever, ni Luca Tavasci da Samedan, ni Fabienne Alder da Puntraschigna. Pleds da festa ha quai dà dal minister da sport grischun Jon Domenic Parolini, da la vice presidenta da Swiss Ski Tamara Wolf e dal vice president da San Murezzan Reto Matossi. Suenter la festa è tut la populaziun stada envidada ad i apero ed atletas ed atlets han accumpli giavischs dad autograms e fotografias.

Or da l'archiv: