Las duas meglras equipas da hockey grischunas da la segunda liga en ina seria da mezfinal. Quai è in siemi per mintga fan da hockey grischun. Lai Valbella, sco segund suenter la qualificaziun, è ida cun levs avantatgs en la seria da mezfinal. E Lai Valbella ha pudì duvrar ils levs avantatgs. San Murezzan percunter ha savì tener cunter. A la fin han dentant chastis dispitaivels fatg la differenza. En la fasa finala da la quarta partida da mezfinal ha San Murezzan gist incassà trais chastis entaifer da duas minutas. En quella fasa da la partida ha Lai Valbella fatg il gol da la victoria e buttà San Murezzan ora dals playoffs.
L'equipa da l'Engiadin'Ota sa dentant mirar cun superbia sin quest playoff. L'equipa è partida cun in nov trenader en quest campiunadi e cun ina squadra fitg giuvna. La finamira era da gudagnar puspè ina giada ina seria da playoff. Cun la victoria cunter Rapperswil Jona è quai reussì. Ed en il mezfinal cunter Lai Valbella era San Murezzan sco ditg vidlonder. A la fin n'ha quai dentant betg tanschì. La squadra ha però pudì far bleras experientschas, experientschas che l'equipa po prender cun sai per la proxima stagiun.
San Murezzan ed Engiadina pronts per playoff
Las duas equipas da hockey engiadinaisas da la segunda liga han terminà la qualificaziun sin las plazzas trais e tschintg. Il EHC San Murezzan era durant la qualificaziun, ch’è gist ida a fin, in zichel pli ferm ch'il CDH Engiadina.
Perquai sa San Murezzan era partir cun l’avantatg da chasa en l’emprima runda da playoff. Il CDH Engiadina è anc durant la davosa partida da qualificaziun crudà enavos sin plazza tschintg.
San Murezzan – Rapperswil ed Engiadina – Kreuzlingen
Duas giadas ha San Murezzan gia giugà durant la qualificaziun encunter Rapperswil, l'emprim adversari en ils playoffs. L'emprim gieu ha San Murezzan anc pers, il segund gieu è lura stà ina chaussa clera. San Murezzan ha gist gudagnà cun 12:3. Cler ch'ins na po betg survalitar quest resultat. Tuttina ha l'EHC San Murezzan mussà ch'els èn ferms a chasa sin l'agen glatsch e quai dat segir blera fidanza en sasez.
Per il CDH Engiadina era gia la qualificaziun per ils playoffs in grond success. Uschia ch'ins pudess crair che ils playoffs èn be pli il dessert. Quai n'è dentant betg il cas. Il CDH Engiadina vul confermar durant ils playoffs la buna qualificaziun e far en la fasa decisiva dal campiunadi anc ina giada in pass enavant.
La stagiun passada era l’equipa avanzada fin en il mezfinal. Quai savess, sche tuts restan sa chapescha sauns, er questa giada puspè esser pussaivel.