Gist per set karatekas Sursilvans va in siemi en vigur l’entschatta d'avust. Lura spetga a Chiba datiers da Tokio il campiunadi mundial da Goju-Kai, in stil da cumbat che vegn è pratitgà en il dojo a Schluein. L’instructur Domenic Lanicca tutga schizunt tranter ils megliers dal mund en quest stil da karate, in stil radund cun mo mez contact.
Era cun ambiziuns fan il viadi en il Giapun, là nua ch’il sport da karate è da chasa, Romana Lanicca-Casanova che fa gia dapi 30 onns karate e Florian Käser ch’ha er cumenzà cun quest sport avant passa 20 onns. El è tranter auter er instructur en il dojo, il num per il local da trenament, a Domat.
Il karate Goju-Kai è in da quatter stils da quest sport da cumbat. Igl è ina disciplina fitg fisica e disciplinada. Plinavant na dovri betg sulet ina buna cundiziun corporala mabain er mentala.
RTR ha dacurt visità in trenament a Schluein, er per sentir il puls intgins mais avant il campiunadi mundial en il Giapun.
