Sin passa 2'200 meters sur mar sa radunan puspè numerusas atletas ed atlets da l'entir mund al Laax Open. Il 2026 ha la concurrenza internaziunala da freestyle lieu dals 14 fin ils 18 da schaner, quai per la 11avla giada. Var 250 snowboardistas e freeskiers sa mesiran en las disciplinas slopestyle e mesapipa davant in public giuven e vegl.
Program Laax Open 2026
Ils megliers freestylers dal mund èn er quest onn puspè da la partida a Laax. Bain n'è la glista cun las atletas ed atlets anc betg enconuschenta, dentant ha l'organisatur gia communitgà la participaziun da quatter victuras e victurs olimpics: sper la skiunza svizra Mathilde Gremaud èn quai la snowboardera Zoi Sadowski Synnott da la Nova Zelanda ed ils snowboarders Su Yiming (China) ed Ayumu Hirano.
Cun il freeskier indigen Andri Ragettli pon ins er far quint, dad el vegn natiralmain spetgà bler a ses event da chasa. A la premiera dal freeski al Laax Open ha l'atlet da 27 onns gudagnà il slopestyle. Ils onns suenter è el daventà 5avel e 6avel.
Las decisiun per las plazzas a podest datti envers la fin d'emna. Il venderdi datti da vesair il final dals skiunz en la disciplina da slopestyle. La sonda è lura tut il focus sin ils snowboardists. Emprim èn ils megliers slopestylers en acziun e la sera sut glisch da projects datti da vesair il spectacul en la halfpipe.
Sper il program sportiv sin il Crap Sogn Gion datti era acts musicals en il vitg a Laax Murschetg.